Маршот започна од Паркот на револуцијата во Кочани, со порака дека се чекори „со љубов, со болка и со достоинство – во име на оние што повеќе не можат да чекорат“. Организаторите потенцираа дека не станува збор за протест, туку за достоинствен повик за правичност, потсетувајќи дека зад секој судски предмет се кријат човечки судбини и неизбришлива болка.
Родителите уште еднаш ја нагласија нивната решеност: „Ние нема да се предадеме, нема да се повлечеме и нема да замолчиме“, барајќи вистинско и правично судење за трагедијата во која загинаа 63 млади луѓе.
Второто рочиште – нов удар за семејствата
Расправата во судницата во затворот Идризово во вторникот повторно беше одложена, овојпат поради тоа што адвокатите не го добиле новиот обвинителен акт. Родителите велат дека ова не е само административно пролонгирање, туку уште една длабока рана – уште една пречка на долгото патување кон правда.
Револтот дополнително се зголемил по рочиштето, кога родителите биле оставени лице-в-лице со обвинетите и нивните адвокати на истиот паркинг. „Не очекувавме привилегии, туку само минимум човечност,“ велат семејствата. „Тоа не беше логистичка грешка – тоа беше понижување.“
„Го чекаме обвинителниот акт за полицијата – мора да се знае кој зошто не реагирал“
Родителите јавно повикаа конечно да се објави обвинителниот акт за полицајците кои биле на должност во ноќта на трагедијата. Прашањата што веќе две години висат во воздух остануваат отворени:
Кој не реагирал? Зошто не биле преземени мерки? Дали навремена интервенција можела да спаси животи?
„Сакаме одговорност! Сакаме објаснување зошто била одбиена помош кога можеле да се спасат наши деца,“ истакнаа родителите.
Борбата продолжува – чекор по чекор, во името на 63-те млади животи
Организаторите порачаа дека ова не е само судска битка. Тоа е поширока, општествена борба – повик до институциите да ја покажат својата совест, до државата да престане да гази врз болката на семејствата и до општеството да не молчи пред системските пропусти.
Родителите велат дека ќе продолжат да чекорат, да зборуваат и да се борат, се додека правдата не добие име и облик.
„Го должиме тоа на нашите деца,“ порачуваат тие.
Извор: Независен
