Сребрениот медал го освои Марио Ванчоски, ученик во 4 година во гимназијата „Славчо Стојменски“ во Штип, кој постигнал трет најдобар резултат во експерименталниот дел од натпреварот, што е извонреден успех на светско ниво.
Бронзениот медал го доби Петар Мирчевски, ученик во 4 година во прилепската гимназија „Мирче Ацев“, додека Теона Ана Георгиевска, ученичка во 3 година во „Јахја Кемал“ во Скопје, беше наградена со пофалница. Дел од тимот беше и Елена Живаљевиќ, ученичка во 4 година, исто така од „Јахја Кемал“.
Успехот е резултат на интензивни подготовки што се одвиваа на Институтот за хемија при Природно-математичкиот факултет во Скопје, под менторство на проф. д-р Миха Буклески и проф. д-р Слоботка Алексовска, членови на Сојузот на хемичари и технолози на Македонија, кој го организираше македонското учество на олимпијадата.
Во подготовките беа вклучени и професорите Владимир Петрушевски, Марина Стефова, Јасмина Петреска-Станоева, асистентите Ивона Софрониевска и Леон Стојанов, како и поранешните олимпијци и студенти Михаил Трајков и Дарко Стојчев, заедно со Марија Петрова и Филип Бојаџиевски, кои дадоа значаен придонес во подготвителниот процес.
Македонските ученици уште еднаш покажаа дека и со ограничени ресурси, но со силна волја и стручно водство, можат рамноправно да се натпреваруваат на највисоко светско ниво во природните науки.
