Македонските тимови повторно ја потврдија својата класа на светската сцена, освојувајќи врвни признанија на престижната олимпијада за роботика Minoan Robotsports Competition Global Olympiad, која се одржа од 3 до 6 април на островот Крит.
Во конкуренција од околу 1.500 тимови од повеќе од 40 држави, македонските претставници доминираа во една од најсложените дисциплини – каде роботите, целосно дизајнирани, изградени и програмирани од учениците, автономно извршуваат комплексни задачи со висока прецизност.
Најголемиот успех го постигна тимот SPACE WALKERS (13–18 години), составен од Павел Попоски, Анастасија Дудеска и Јаков Петков, кои освоија златен медал. Нивните помлади колеги од тимот SPACE WALKERS ALFA (до 12 години) – Матеа Андонова, Глигор Дединец и Петар Копачев – се закитија со сребро, додека тимот SPACE WALKERS JR, во состав Андреј Спасевски и Стефан Пешов, го освои одличното петто место.
Зад овие резултати стои посветената работа на менторите Александра Митревска и Жарко Поп-Илиев од СТЕМ Академија, кои со години ги водат младите таленти кон меѓународни успеси.
„Ова искуство им дава на децата самодоверба дека можат рамноправно да се натпреваруваат на глобално ниво. Тие учат како да претворат идеја во функционален робот, како машината ‘размислува’ и како да решаваат проблеми под притисок. Најважно, учат дека успехот доаѓа преку тимска работа и синхронизација,“ истакна Митревска.
Овој успех не е изолиран. Македонските тимови веќе неколку години по ред бележат извонредни резултати на оваа олимпијада – во 2024 и 2025 година освоија повеќе први, втори и трети места, што го потврдува континуитетот и квалитетот на нивната работа.
Повеќе од натпревар, оваа олимпијада претставува платформа каде младите развиваат вештини од иднината – од инженерство и програмирање до критичко размислување и отпорност. За македонските ученици, роботиката веќе не е само хоби, туку сериозен чекор кон кариера во технологијата и глобалниот пазар.
