Во издание на Институт за македонски јазик „Крсте Мисирков“, деновиве е објавен првиот том од првиот Македонски етимолошки речник – капитално научно дело кое за првпат систематски го обработува потеклото и развојот на македонските зборови.
Првиот том ги опфаќа зборовите од А до Ж и нуди детална етимолошка анализа, со осврт на историските, дијалектолошките и компаративните аспекти на македонскиот јазик, во контекст на словенските и пошироките индоевропски јазични врски.
Ова издание се смета за пресвртна точка во македонската лингвистика, бидејќи досега не постоеше сеопфатен етимолошки речник изработен на научна основа и посветен исклучиво на македонскиот јазик. Проектот има долгорочен карактер и во наредниот период се очекува објавување на следните томови.
Со ова издание, Институтот „Крсте Мисирков“ ја зацврстува својата улога како клучна институција во истражувањето, заштитата и научната афирмација на македонскиот јазик.
