Обилните врнежи што ја зафатија земјата на 15 февруари 2026 година предизвикаа излевање на реки и сериозни поплави во западниот и северниот дел од Македонија. Најпогодени се општините Кичево и Сарај, каде се вршеше евакуација на жители и интензивна санација на штетите.
Според последната хидролошка информација од Управа за хидрометеоролошки работи, во текот на вечерта и ноќта се задржал високиот водостој на реките во западна Македонија, додека дополнително се зголемило нивото на река Вардар во средниот дел од течението. Исклучително високи водостои и натаму се регистрираат во горниот тек на Вардар, како и на река Треска, каде постои опасност од излевање.
На останатите реки во западниот дел од земјата водостоите постепено опаѓаат, но поради големите количества вода и засилената брзина на течење, Треска останува ризична, особено кај времените мостови. Во источна Македонија состојбата е претежно стабилна, со позначително зголемување единствено во долниот дел од сливот на река Струмица.
Кичево: Евакуации и итни интервенции
Во Кичево, по наглото влошување на состојбата, локалните власти организираа координирана интервенција за заштита на граѓаните и нивниот имот. На терен се ангажирани екипи и механизација за:
- расчистување на одводни правци и критични делници,
- отстранување наноси, кал и отпад,
- чистење и пробивање канали и пропусти,
- испумпување вода и обезбедување пристап до загрозени домаќинства.
Евакуираните лица се сместени во спортската сала во Иванидол, како привремено решение, додека трае проценката на штетите.
Сарај: Над 30 домаќинства под вода
Во Скопскиот регион, кризата е најизразена во Општина Сарај, каде се поплавени над 30 домаќинства, особено во селата Буковиќ и Семениште. На итен состанок на кризниот штаб присуствувале градоначалникот Мухамед Елмази и директорот на Центар за управување со кризи, Мухамед Али.
Биле мобилизирани екипи од Бригадата за противпожарна заштита на Град Скопје и ЈП „Водовод и канализација“ за испумпување на водата. Повторувањето на поплавите во овие населени места повторно ја отвори потребата од долгорочна стратегија за управување со атмосферските води.
Предизвици на терен
Координацијата меѓу Центарот за управување со кризи, Дирекцијата за заштита и спасување и локалните самоуправи е интензивна, но на површина излегоа и проблемите со ограничените технички ресурси. Сепак, беше реализирана успешна спасувачка акција во селото Беловиште, каде беа извлечени заглавени лица.
Според прогнозите, врнежите ќе продолжат и денеска, што значи дека надлежните служби остануваат во состојба на зголемена подготвеност.
