Загадувањето на воздухот е смртоносна закана за јавното здравје, но некои делови од Европа се изложени на многу поголем ризик од другите. Загадувањето на воздухот е поврзано со рак на белите дробови, срцеви и респираторни заболувања, мозочен удар, лоши резултати при раѓање. Тоа е особено опасно за постарите луѓе, предизвикувајќи околу 4 проценти од сите смртни случаи кај возрасните на возраст од 65 години и постари.
Според неодамнешниот извештај на Европската комисија и Организацијата за економска соработка и развој (ОЕЦД), Централна и Источна Европа имаат највисоки стапки на смртност поврзани со PM2,5 честичките.
„Најголемиот јаз во Европа што го гледаме е истокот и западот и ова многу се усогласува со БДП и социоекономското потекло на двата региона“, вели Зорана Јовановиќ Андерсен, професорка по еколошка епидемиологија на Универзитетот во Копенхаген и член на Комитетот за животна средина и здравје при Европското респираторно друштво.
Северна Италија, Полска и Чешката Република забележаа зголемени стапки на смртност од PM2,5, што е главно предизвикано од резиденцијални извори, како што се согорувањето јаглен за загревање домови и земјоделскиот сектор.
Севкупно, изложеноста на PM2.5 предизвикала околу 239.000 предвремени смртни случаи во Европа во 2021 година, додека други 48.000 луѓе починале како резултат на изложеност на азот диоксид.
Истата година, Светската здравствена организација (СЗО) ги ажурираше своите упатства за квалитетот на воздухот, намалувајќи го препорачаниот праг за годишни концентрации на азот диоксид и ситни честички (PM2,5) како што се прашина, чад и саѓи од издувните гасови.
Минатиот месец, пак, стапија на сила построгите правила за квалитетот на воздухот кои имаат за цел да ја доближат Европската унија до стандардите на СЗО до 2030 година и да ги обврзат земјите-членки да ги следат загадувачите како ситните честички, црниот јаглерод и амонијак.
Ажурираната директива на ЕУ, во меѓувреме, им дава право на граѓаните со здравствени проблеми поврзани со загадувањето да ја тужат својата влада доколку таа не ги почитува правилата на ЕУ за квалитетот на воздухот.
Загадувањето на воздухот можеби е главната закана за здравјето на животната средина со која се соочува Европа, но има тенденција да се преклопува со други фактори, како што се недостатокот на зелени површини, загадувањето со бучава и екстремната топлина, кои имаат влијание врз здравјето на луѓето.
