Густата магла што утрово го зафати скопскиот регион предизвика сериозни проблеми во авионскиот сообраќај, поради што сите летови од и кон Меѓународниот аеродром Скопје се откажани или пренасочени кон други аеродроми во регионот.
Иако дел од летовите се прикажани како одложени, засега не е извесно дали во текот на денот ќе има редовни полетувања или слетувања, поради континуирано намалената видливост.
Откажани летови поради магла
Поради лошите временски услови, откажани се летовите на следните авиокомпании:
- Wizz Air – кон Дортмунд, Брисел, Париз, Љубљана, Базел, Меминген и Венеција
- Croatia Airlines – кон Загреб
- Turkish Airlines – кон Истанбул
Пренасочени летови
Дел од авионите што не можеле да слетаат во Скопје биле пренасочени и слетале на аеродромите во Охрид, Приштина, Софија, Тирана и Солун.
Во моментов, единствено е потврдено слетување на авион од Софија во 13:30 часот, но надлежните служби нагласуваат дека ситуацијата е променлива и зависи од подобрување на временските услови.
На аеродромот има отворени капии и за одредени летови кои треба да полетаат, но се чека конечна дозвола од контролата на летање.
Патниците се советуваат редовно да ги следат информациите од авиокомпаниите и аеродромските служби.
