Агенцијата на Обединетите нации за нуклеарна енергија во саботата соопшти дека не регистрирала никакво „радиолошко влијание“ по американските и израелските напади врз Иран, ниту по иранските одмазднички акции во други земји од регионот. Во соопштението не е наведено дали биле цел на напад ирански нуклеарни постројки.
„Меѓународната агенција за атомска енергија (МААЕ) внимателно ги следи случувањата на Блискиот Исток и повикува на воздржаност со цел да се избегнат нуклеарни безбедносни ризици за населението во регионот“, објави агенцијата на платформата X.
„МААЕ е во постојан контакт со земјите од регионот и досега нема докази за какво било радиолошко влијание“, се додава во соопштението.
САД и Израел во саботата извршија напади врз Иран, со што започна нова ескалација на конфликтот на Блискиот Исток.
