Во време на жестока јавна дебата за влијанието на алкохолот врз здравјето, нова студија носи охрабрувачки вести за љубителите на вино. Прелиминарните податоци од големо истражување покажуваат дека умерената консумација на вино може да биде поврзана со помал ризик од смрт, особено од кардиоваскуларни болести, во споредба со пиењето пиво, жестоки пијалаци, па дури и целосна апстиненција.
Истражувањата во последните години испраќаа спротивставени пораки. Додека едно истражување од 2023 година тврдеше дека нема сигурна количина на алкохол, други институции, како Американското Министерство за здравство, ја сметаат умерената консумација за прифатлива. Некои студии дури го поврзуваат црното вино со здравствени придобивки.
Новата британска студија следела повеќе од 340.000 возрасни лица на возраст од 40 до 69 години во периодот од 2006 до 2022 година. Главниот заклучок е дека помалата консумација на алкохол генерално е поздрав избор. Лицата кои пиеле големи количини – повеќе од три пијалаци дневно за мажи и 1,5 за жени – имале значително поголем ризик од смрт од рак, од сите здравствени причини и од срцеви болести.
Сепак, истражувањето покажало дека видот на пијалокот е важен. Умерените консументи на вино имале 21% помал ризик од смрт од кардиоваскуларни болести во споредба со оние кои не пијат или пијат ретко. Умереното пиење пиво, сидар или жестоки пијалаци било поврзано со зголемен ризик од 9% од истите болести.
Експертите објаснуваат дека антиоксидансите и полифенолите во виното можат да имаат заштитен ефект врз срцето и крвните садови, иако виното не треба да се гледа како лек. Исто така, стилот на живот на луѓето кои пијат вино – со оброци и поздрави навики – може да придонесе за овие резултати, додека пивото често се консумира надвор од оброците и е поврзано со помалку здрав начин на исхрана.
Важно е да се истакне дека умереноста е клучна. Прекумерното пиење не носи придобивки, па советот е не повеќе од една до две чaши дневно, секогаш со храна и во друштво на пријатели или семејство, со денови без алкохол во текот на неделата.
Истражувањето се базира на самопријавени податоци и на британската популација, каде 94,6% од учесниците биле бели, па резултатите не можат целосно да се применат глобално. Подетални информации ќе бидат познати по официјалното објавување на студијата.
