Според усвоениот план, воениот буџет следната година ќе достигне 5,38 проценти од БДП, што претставува историски највисоко ниво на издвојувања за вооружените сили од стекнувањето независност од Советскиот Сојуз.
Во апсолутни бројки, Литванија ќе потроши 4,79 милијарди евра за одбранбени потреби, што претставува зголемување од 43 проценти во однос на 2025 година, соопшти литванското Министерство за одбрана.
Со ова, државата се позиционира меѓу земјите членки на НАТО кои издвојуваат најголем процент од националниот доход за одбранбени капацитети. Најголемиот дел од средствата ќе биде наменет за модернизација на армијата, набавка на нови и напредни оружени системи, јакнење на воздушната одбрана и проширување на воената инфраструктура.
Клучен приоритет за Вилнус останува распоредувањето на германската армиска бригада во Литванија до 2027 година. Германија во моментов ја формира Оклопната бригада 45, која ќе биде трајно лоцирана во земјата како дел од напорите за зајакнување на источниот фронт на НАТО.
Литванија, која се граничи со руската ексклава Калининград и со Белорусија блиска руска сојузничка го гледа руско-украинскиот конфликт како директна закана за сопствената безбедност. Како резултат, државата интензивно ги зацврстува своите одбранбени капацитети и ја унапредува воената подготвеност во согласност со новите безбедносни реалности во регионот.
Извор: Index.hr
