Литванија побара Европската унија да ги прошири санкциите против белорускиот режим, така што тие ќе ги опфатат и таканаречените хибридни активности насочени против ЕУ. Ова денеска го изјави литванскиот министер за надворешни работи Кестутис Будрис, во пресрет на состанокот на шефовите на дипломатиите на земјите членки во Брисел.
Според Будрис, актуелниот санкциски режим не ги опфаќа доволно сите облици на притисок и закани кои, како што наведува Литванија, доаѓаат од Белорусија. „Навистина очекувам проширување на санкциите против Белорусија, доколку овие хибридни активности продолжат“, изјави тој пред почетокот на Советот за надворешни работи на ЕУ.
Барањето на Вилнус доаѓа по прогласувањето вонредна состојба во Литванија минатата недела, поради серија инциденти поврзани со балони испратени од територијата на Белорусија. Според литванските власти, овие балони биле користени за криумчарење, а во неколку наврати предизвикале и нарушување на воздушниот сообраќај, што властите го оценуваат како безбедносен ризик.
Како дел од мерките, литванската влада побарала од парламентот да одобри ангажирање на војската во поддршка на полицијата и граничните служби, со цел зајакнување на контролата и справување со новите закани. Овој чекор е редок и укажува на сериозноста со која земјата ги третира случувањата на источната граница на Европската унија.
Литванија веќе подолго време е меѓу најгласните критичари на режимот во Минск, особено поради, како што тврди, организираното користење на миграцијата, криумчарењето и други нестандардни методи како политички притисок врз земјите членки на ЕУ. Таквите активности во европскиот безбедносен дискурс сè почесто се опишуваат како дел од хибридните закани.
Прашањето за санкциите против Белорусија е на дневен ред на денешниот состанок на министрите за надворешни работи на ЕУ во Брисел, каде се очекува дискусија за можностите за проширување на постојните мерки, но и за поширокиот безбедносен контекст на источната граница на Унијата.
