Официјалната кампања беше претставена на 19 јуни, токму во период кога Лиам и Ноел се подготвуваат за нивната долгоочекувана турнеја за повторно обединување ова лето.
Во триминутното видео, нивниот класичен сингл „Live Forever“ од 1994 година се репродуцира низ монтажи од архивски и нови снимки од браќата облечени во Adidas. Видеото не само што најавува нова колекција производи, туку се осврнува и на нивните легендарни настапи во Кнебворт и Хитон Парк.
Колекцијата вклучува Firebird тренерки, дресови со раглан ракави, капи и јакни за тренинг. Таа ќе биде достапна преку продавниците на Adidas, официјалната страница на брендот, веб-страницата на Oasis, новата поп-ап продавница и на сите нивни претстојни настапи во живо.
Иако многу обожаватели со ентузијазам ја пречекаа соработката – особено затоа што означува ново појавување на браќата заедно по објавата за обединувањето – дел од јавноста беше критична, доведувајќи ја под прашање автентичноста на партнерството со глобалниот спортски бренд.
Денес (23 јуни), Лиам се огласи преку X (поранешен Twitter) за да им одговори на критичарите.
„Слушам многу муабети за тоа за кого е наменета соработката меѓу Adidas и Oasis“, напиша тој. „Сега е за сите – приклучете се и престанете да се жалите. Со љубов, LG X.“
Тој додаде:
„И ако не ви се допаѓа – не мора да го поддржувате. Но, престанете со кукање.“
Во посебна објава, Галагер напиша:
„Ох, ова е за младите обожаватели… не, ова е за сите – и млади и стари. P.S. Oasis не дискриминира.“
Историско обединување на сцената
Турнејата на Oasis ќе започне на 4 јули на стадионот Principality во Кардиф и ќе вклучи 19 концерти низ Обединетото Кралство и Ирска. Како предгрупи ќе настапуваат Ричард Ашкрофт и Cast. Бендот ќе одржи дури седум вечери на лондонскиот стадион Вембли.
По европската фаза, Oasis продолжуваат со концерти во Канада, САД, Мексико, Јужна Кореја, Јапонија, Австралија, Аргентина, Чиле и Бразил – вкупно 41 настап, а финалето е закажано за 23 ноември во Сао Паоло.
На турнејата ќе им се придружат и оригиналните членови Пол „Боунхед“ Артурс и Џем Арчер, како и басистот Енди Бел. Нов на тапани ќе биде Џои Воронкер – музичар со богата кариера, кој свирел со Beck, R.E.M., Елиот Смит и Роџер Вотерс, а беше и член на Atoms for Peace на Том Јорк.
Извор: NME
