Производителот на популарните коцки инвестираше една милијарда долари во новиот погон како дел од долгорочната стратегија за производство блиску до клучните пазари, со цел да ги намали трошоците и да се заштити од надворешни фактори и нарушувања во синџирот на снабдување.
Ова семејно претпријатие од Данска сега има вкупно шест фабрики: во Данска, Унгарија, Чешка, Мексико, Кина и Виетнам. Компанијата гради и нов погон во САД, кој се очекува да започне со работа во 2027 година.
Во март, извршниот директор на Лего, Нилс Кристиансен, изјави при претставувањето на резултатите за 2024 година дека не се премногу загрижени за американските царини на Мексико.
Од Лего објавија дека вкупните приходи за 2024 година пораснале за 13 проценти, што е околу шест пати посилно отколку во 2023, достигнувајќи 74,3 милијарди дански круни (9,9 милијарди евра).
САД наметнаа царина од дури 46 проценти на Виетнам, а извозот во САД сочинува околу 30 проценти од бруто домашниот производ на земјата. Ова е сериозен удар за Виетнам, бидејќи извозот во САД бил клучен за растот на неговото стопанство. Овие нови царини ќе бидат предизвик за така наречената „бамбус дипломатија“, со која Виетнам се трудел да одржува балансирани односи со Кина и САД.
Под водство на новиот генерални секретар на Комунистичката партија, То Лама, Виетнам започна амбициозен план за изградба на високо-платена економија заснована на знаењето и технологијата до 2045 година. Целта е годишна стапка на раст поголема од осум проценти. Извозот во САД, кој е најголемиот пазар за Виетнам, беше клучен за овој план. Многумина економисти сметаат дека овој план сега ќе биде уште потежок за остварување, но Лего би можел да помогне.
