Компанијата LEGO наводно работи на нов, досега најголем сет, кој би можел да стане вистински хит меѓу љубителите на брендот. Според неофицијални информации, станува збор за модел од серијата LEGO Architecture, инспириран од познатата катедрала Sagrada Familia.
Според гласините што кружат меѓу фановите, сетот би можел да содржи дури 12.060 делови, со што би го надминал актуелниот рекордер LEGO Art World Map set. Информациите доаѓаат од познат извор во LEGO заедницата, но засега нема официјална потврда од компанијата.
Се претпоставува дека лансирањето на овој сет ќе биде поврзано со два значајни настани – очекуваното завршување на изградбата на катедралата во Барселона, како и одбележувањето на стогодишнината од смртта на нејзиниот архитект Antoni Gaudí.
Иако деталите за дизајнот сè уште не се познати, се шпекулира дека сетот би можел да се појави во продажба до крајот на годината. Љубителите на LEGO ќе мора да почекаат официјална најава за да ги дознаат сите информации.
