По смртта на 30-годишен маж, кој починал откако земал фалсификуван оксикодон, холандските власти ги предупредуваат луѓето да не нарачуваат лекови против болки преку Интернет.
Според Институтот Тримбос, холандска научно-истражувачка агенција, апчињата биле купени преку интернет без рецепт. Тие не содржеле оксикодон, кој се препишува за пациенти со силна болка, туку нитазен – синтетички опиоиди кои се многу посилни од оксикодон, морфин или фентанил.
Според Институтот, лековите се толку моќни што само неколку милиграми можат да предизвикаат фатални проблеми со дишењето. Исто така, ефектите траат подолго, зголемувајќи го ризикот од предозирање.
Полицијата во Амстердам сè уште се обидува да открие од каде го набавил лажниот оксикодон сега починатиот човек. Но, неговата смрт е една од неколкуте здравствени кризи поврзани со синтетички дроги во Холандија неодамна.
Холандскиот здравствен и младински инспекторат (IGJ) соопшти дека повеќе луѓе добиле итна медицинска помош откако земале апчиња кои се продавале на интернет како оксикодон, но се покажало дека содржат нитазен.
Инспекторатот соопшти дека дрогата се продава преку интернет и на социјалните мрежи. Тие изгледаат како оксикодон и обично имаат оригинално пакување и „речиси не се разликуваат“ од вистинските лекови.
„Ова покажува колку е опасно да се нарачуваат лекови на рецепт преку Интернет“, рече главниот инспектор на IGJ Хенк де Грот и додаде: „Можеби изгледа реално, но немате апсолутно никаква идеја што купувате“.
Предупредувањето доаѓа во време на зголемување на достапноста на нитазените и другите синтетички опиоиди во делови од Европа, кои Агенцијата за дроги на Европската Унија, ги опиша како „важна закана што се појавува“.
Тримбос ги повика луѓето да избегнуваат да купуваат лекови против болки преку Интернет и рече дека луѓето треба да повикаат итна помош ако почнат да се чувствуваат лошо по земањето оксикодон. Во меѓувреме, IGJ рече дека луѓето можат да пријават веб-страници коишто продаваат лекови на рецепт.
