Најмалку десет скијачи се водат како исчезнати, а шест други се заробени и чекаат спасување по лавина што погоди оддалечена патека во планинскиот венец Sierra Nevada во американската сојузна држава Калифорнија, соопштија локалните власти.
Лавината го погодила подрачјето Касл Пик, во близина на градот Траки, околу 16 километри северно од езерото Тахо, околу 11:30 часот по локално време. Под снежната маса биле затрупани вкупно 16 скијачи – четворица водичи и 12 клиенти. Најмалку шест лица преживеале и останале на местото на несреќата, додека останатите се водат како исчезнати.
Капетанот Расел Грин од канцеларијата на шерифот во округот Невада изјави дека спасувањето ќе биде бавно и исклучително тешко поради нултата видливост и постојаната опасност од нови лавини. Облиската автопатска делница била затворена поради силната зимска бура.
Пред инцидентот, регионалниот лавински центар издал предупредување за „висока опасност од лавини“ во скијачката област. Властите оценија дека одлуката групата да влезе во зафрлено подрачје под такви услови можеби не била разумна, но истрагата сè уште трае.
Спасувачки тимови на скии и специјални возила со гасеници тип „Snowcat“ се обидуваат да стигнат до местото на несреќата. Преживеаните комуницираат со спасувачите преку лавински примопредаватели и текстуални пораки, а се засолниле во импровизирано засолниште направено делумно од церада, обидувајќи се да преживеат во екстремните услови.
Според податоците од лавинските центри во САД, лавините во просек одземаат околу 27 животи секоја зима во последната деценија. Доколку се потврдат најлошите стравувања, овој инцидент би можел да биде меѓу најсмртоносните поединечни лавини во историјата на земјата.
Гувернерот на Калифорнија бил информиран за несреќата, а државните власти координираат целосна акција за пребарување и спасување во соработка со локалните служби за итни случаи.
