Возачот на McLaren, Ландо Норис, им оддаде признание на своите родители по најголемиот успех во кариерата – освојувањето на титулата шампион во Формула 1.
Британецот го зазеде третото место на Големата награда на Абу Даби, на која победи Макс Верстапен, кого Норис го престигна за два бода во вкупниот пласман и така ја освои титулата.
„Ова е за мама и тато, ми дозволија да го следам овој сон кој сега стана реалност“, изјави Норис по прогласувањето на победниците на патеката „Yas Marina“.
Пред последната трка сезона, Норис имаше 12 бодови предност пред Верстапен и 16 бодови предност пред тимскиот колега Оскар Пиастри. На стартот загуби позиција од Австралиецот, но благодарение на различната стратегија и две посети во бокс, успеа да се пробие и врати на третото место, што му беше доволно за титулата.
„Беше долга трка, во Формула 1 може да се случи сè, но сакав да се борам до крај. Макс не’ гонеше, Оскар се приближи, не ми олеснија, но сега сум среќен“, нагласи Норис.
Возачот на McLaren му донесе на тимот прва титула по 2008 година и стана 11-ти британски возач кој стана светски шампион.
„Боже, не плачев долго, не мислев дека ќе плачам, но плачев. Ова беше долго патување. Благодарност до сите во McLaren, моите родители, мама, тато… Ме поддржуваа од почеток. Изгледам како губитник“, рече тој во првата изјава по освојувањето на титулата.
„Чувството е неверојатно. Честитки до Макс и Оскар, моите најголеми противници. Чест ми беше да се борам со нив, беше предизвикувачки, но успеавме“, додаде Норис.
Норис ја освои титулата со два бода предност пред Верстапен, додека Пиастри ја заврши сезоната како трет со 13 бодови заостанување.
Следната сезона на Формула 1 започнува со Големата награда на Австралија, која е закажана од 6 до 8 март.
