Главните фактори што ја поттикнаа оваа трансформација се новиот долгогодишен договор што Јамал го потпиша со ФК Барселона, како и најавата дека тој ќе го наследи дресот со број 10 – симбол што е нераскинливо поврзан со Лионел Меси. Овој дрес не само што претставува тежина на теренот, туку и огромен потенцијал за глобален маркетинг. Со тоа, Барселона и Adidas го потврдуваат статусот на Јамал како играч околу кој се гради иднината на клубот и на брендот.
Adidas планира голема рекламна кампања во која ќе се појават и Меси и Јамал, поставувајќи го моментот како симболично предавање на клучевите на царството. Според информации од добро упатени извори, рекламите ќе ја истакнат поврзаноста меѓу генерациите и ќе го позиционираат Јамал како логичен и природен наследник на Меси, не само во клубот, туку и во глобалниот спортски пејзаж.
По Светското првенство во 2026 година, Adidas ќе ја редефинира својата структура на водечки спортисти. Според планот, тројцата главни фудбалски амбасадори ќе бидат Ламин Јамал, Џуд Белингем и Лионел Меси, при што улогата на Меси ќе биде повеќе симболична и амбасадорска, додека Јамал ќе го превземе приматот како најистурено маркетиншко лице.
Ламин Јамал веќе е официјално Adidas спортист со сопствено лого и првиот модел на специјални патики – LY304 – кој излезе во лимитирана серија од само 304 пара. Тоа го прави еден од најмладите спортисти во историјата на брендот што имаат сопствена линија.
Со овие потези, Adidas прави јасна изјава: иднината започнува сега, и Ламин Јамал е нејзиното лице.
