Ладните стапала во зимски период често се препишуваат на ниските температури, но експертите предупредуваат дека оваа сензација на студ, особено ако е постојана, може да укаже на сериозен здравствен проблем – висок холестерол.
Високиот холестерол е познат како „тивок убиец“ затоа што често нема јасни симптоми додека не предизвика компликации како срцеви заболувања или мозочен удар. Меѓутоа, еден од можните знаци на висок холестерол е периферна артериска болест (ПАБ), состојба која настанува поради намален проток на крв во нозете и стапалата.
Кај ПАБ доаѓа до наталожување на плак во артериите на нозете и стапалата, што е познато како атеросклероза. Оваа состојба ги стеснува или целосно ги блокира артериите, намалувајќи го протокот на крв и предизвикувајќи чувство на студ во стапалата. Со недостаток на циркулација, ткивата во нозете и стапалата не добиваат доволно кислород и хранливи материи, што може да предизвика многу симптоми и да го зголеми ризикот од сериозни кардиоваскуларни проблеми, како што се срцев удар и мозочен удар.
Освен студени стапала, ПАБ може да предизвика и други симптоми. Некои од нив се губење на влакна на нозете и стапалата, вкочанетост или слабост во нозете, кршливи нокти на нозете кои бавно растат, чирови или отворени рани на стапалата и нозете кои не зараснуваат, промена на бојата на кожата на нозете (нозете можат да станат побледи или да имаат синикава боја), сјајна кожа, еректилна дисфункција и губење на мускулна маса во нозете.
Симптомите на ПАБ обично се развиваат полека, но ако изненадно се влошат, тоа може да биде знак на сериозен проблем кој бара итна медицинска помош.
Како се дијагностицира ПАБ?
Лекарот може да постави дијагноза врз основа на физички преглед, разговарање за симптомите и спроведување на тест (АБПИ). Во некои случаи, АБПИ се спроведува по физичка активност, како што е трчање на патека или возење велосипед, за да се види како физичката активност влијае на циркулацијата.
Иако не постои лек за периферната артериска болест, симптомите можат да се ублажат со промени во начинот на живот и примената на лекови. Стручњаците препорачуваат редовна физичка активност, исхрана богата со влакна и ниска содржина на заситени масти, престанок на пушењето, контрола на телесната тежина и умерена консумација на алкохол. Покрај промените во начинот на живот, лекарите често препишуваат статини за намалување на нивото на холестерол и антихипертензивни лекови за контрола на крвниот притисок.
