Сѐ послабите економски показатели на САД ги наведоа инвеститорите на девизниот пазар да ги вградат очекувањата дека Федералните резерви (ФЕД) ќе ги намалат каматните стапки до крајот на годината – во три наврати, првото веќе во септември – што минатата недела го намали курсот на американскиот долар на светските девизни пазари.
Индексот на доларот, кој ја мери вредноста на американската валута во однос на шесте најважни светски валути, минатата недела падна за 0,44 проценти, на 98,27 поени.
Притоа, курсот на еврото порасна за 0,47 проценти во однос на доларот, на 1,1639 долари. Американската валута ослабе и во однос на јапонскиот јен, за 0,22 проценти, па доларот се тргуваше по 147,72 јена.
Успорување на економскиот раст
Курсот на доларот започна да паѓа по неодамна објавениот извештај за вработеноста за јули, кој покажа значително помал број нововработени отколку што се очекуваше. Дополнително, и податоците за падот на активноста во американскиот услужен сектор во јули, како и слабеењето на побарувачката на пазарот на недвижности, укажуваат на забавување на економскиот раст.
Следниот важен показател за состојбата на американската економија ќе бидат податоците за потрошувачките цени за јули, кои ќе бидат објавени во вторник и внимателно ќе се следат за да се види дали новите царини повторно предизвикуваат инфлаторни притисоци. „ФЕД сега се соочува со ризици по своите цели за инфлацијата и вработеноста и ќе мора внимателно да балансира при донесување монетарни одлуки“, изјави во петокот претседателот на ФЕД во Сент Луис, Алберто Мусалем.
Очекувања за намалување на каматните стапки
Очекувањата за намалување на каматните стапки во САД растат не само поради разочарувачкиот извештај за вработување и другите показатели, туку и поради најавата на американскиот претседател Доналд Трамп дека ќе постави на чело на ФЕД личност со попопустлив став кон монетарната политика, по истекот на мандатот на сегашниот претседател Џером Пауел во мај следната година.
Трамп повеќепати го критикуваше Пауел дека не ги намалил каматните стапки и, иако се откажа од заканите дека ќе го смени пред истекот на мандатот на 15 мај, ја забрза потрагата по негов наследник. Според Bloomberg, најверојатен кандидат на Трамп за нов претседател на ФЕД е сегашниот гувернер Кристофер Валер.
