Двајца мажи го загубија животот, а уште двајца се хоспитализирани по насилен напад со нож што се случи во понеделникот во центарот на Лондон. Еден од повредените мажи, кој е во критична состојба, е уапсен под сомнение дека е директно поврзан со нападот.
Според соопштението на Метрополитен полицијата, инцидентот се случил околу 13:00 часот по локално време, во деловен објект на улицата Long Lane, во лондонската населба Саутворк (Southwark).
На местото на настанот, полицијата затекнала четири лица со убодни рани. Еден од нив, 58-годишен маж, починал на самото место. Останатите биле веднаш префрлени во болница, каде што еден од нив, 27-годишен маж, подлегнал на повредите.
Другите двајца се во триесеттите години. Едниот е вон животна опасност, додека четвртиот, кој е и осомничен за нападот, е во животно загрозувачка состојба.
„Нема закана за јавноста“
Главната детективка Ема Бонд изјави дека истрагата е сè уште во рана фаза:
„Работиме напорно за да ги откриеме сите околности околу овој шокантен инцидент. Засега немаме индикации дека се работи за терористички чин, ниту дека постои дополнителна закана за јавноста.“
Инцидентот се случил во област позната по скапи станови и деловни простори, што дополнително ја шокираше јавноста. Еден од жителите, кој сакаше да остане анонимен, изјавил дека во тој дел „не се очекува насилство“.
Реакции од заедницата
Наташа Енин, членка на општинскиот совет на Саутворк, изрази сочувство до семејствата на загинатите:
„Скршена сум и длабоко нажалена од загубата на два човечки животи. Моето искрено сочувство оди до нивните семејства и пријатели.“
Лондон и во изминатиот период се соочуваше со зголемено насилство со ножеви, особено во урбани и густо населени области. Иако властите вложуваат во превенција и кампањи за разоружување, инцидентите со смртоносен исход и натаму се случуваат, предизвикувајќи загриженост кај јавноста.
