Браун бил уапсен во хотел во Манчестер во раните утрински часови во четвртокот и приведен под сомнение дека му нанел тешки телесни повреди на музичкиот продуцент Абе Дијау во ноќниот клуб „Тејп“ во Мејфер.
Британскиот таблоид The Sun објави дека дознал за присуството на Браун во Велика Британија во средата и дека по тоа ја известил Метрополитенската полиција.
Метрополитенската полиција потврди дека 36-годишен маж е уапсен и се наоѓа во притвор. Претставниците на Крис Браун засега не дадоа коментар.
Портпарол на Метрополитенската полиција изјави за BBC News:
„36-годишен маж беше уапсен во хотел во Манчестер, кратко по 02:00 часот во четврток, 15 мај, под сомнение за нанесување тешки телесни повреди. Тој е приведен и останува во притвор. Апсењето се однесува на инцидент што се случил на плоштадот Хановер на 19 февруари 2023 година. Истрагата ја водат детективи од Основната командна единица на Централно-западната област.“
Според The Sun, полицајци од Метрополитенската полиција отпатувале во Манчестер откако дознале дека Браун пристигнал со приватен авион, по што го уапсиле.
Во изјава за The Sun во 2023 година, г. Дијау тврдеше дека Браун го удрил по главата со шише, а потоа продолжил да го удира и шутира додека лежел на подот. Дијау изјавил дека по нападот му откажало коленото, бил пренесен во болница и му биле потребни патерици за движење по отпуштањето.
Р&Б пејачот Крис Браун се прослави пред околу две децении и е познат по хитовите како „Beautiful People“, „No Air“, „Under The Influence“, „Run It“ и „Turn Up The Music“.
Тој моментално е на европска турнеја и има закажано неколку концерти во Велика Британија во јуни и јули.
Извор: BBC
