Од Основниот суд во Кочани потврдија дека доцна синоќа завршиле сите рочишта на кои била изречена оваа мерка, а Кривичниот совет одлучувал по поднесените жалби. „Основниот суд во Кочани продолжува да постапува по предлозите и барањата на Обвинителството“, изјавија од судот.
Бектеши е приведен поради нелегалната лиценца за кабаре што ја имала фирмата „ММММ Кафе“ ДООЕЛ Кочани за клубот „Пулс“, која била издадена на 13 март 2024 година, во време кога тој раководел со Министерството за економија. Документот бил потпишан од тогашната државна секретарка Размена Чекиќ-Дуровиќ.
Поранешниот министер беше спроведен во Судот во Кочани од полициската станица „Карпош“ во Скопје, каде што беше повикан на распит. Во тек е натамошната постапка за утврдување на одговорноста за трагичниот настан.
