Засилената операција за спроведување на имиграциските мерки во американската држава Минесота е официјално завршена, соопшти специјалниот пратеник на Белата куќа за границата, Том Хоман, додека во Вашингтон трае политички застој околу финансирањето на Министерството за внатрешна безбедност (DHS).
Повеќемесечната акција наречена „Operation Metro Surge“, која предизвика масовни протести, илјадници апсења и смрт на двајца американски државјани, привршува. Во екот на операцијата, во областа на Минеаполис биле распоредени околу 3.000 имиграциски службеници.
Хоман ја презеде командата кон крајот на јануари, откако федерални агенти за време на интервенции ги застрелаа Рене Гуд и Алекс Прети, што предизвика силен политички притисок врз администрацијата на претседателот Доналд Трамп.
Над 4.000 апсења
Според Хоман, во текот на операцијата биле извршени повеќе од 4.000 апсења, иако не прецизираше колку од нив се однесуваат на лица означени како безбедносна закана. Тој нагласи дека приоритет биле „најопасните криминалци“, но додаде дека и сите останати кои престојуваат во земјата без документи можат да бидат предмет на депортација.
„Претседателот Трамп вети масовни депортации и тоа ќе го добие оваа земја“, изјави Хоман.
Повеќе од 200 лица биле уапсени поради попречување на федералните агенти за време на протестите, а Хоман порача дека нема да има толеранција за насилство врз службени лица.
Критики од локалните власти
Иако според федералните власти операцијата ги исполнила целите, вклучително и подобра координација со локалните институции, гувернерот на Минесота Тим Волц и градоначалникот на Минеаполис Џејкоб Фреј претходно го критикуваа начинот на нејзино спроведување.
Граѓански организации предупредија на прекумерна употреба на сила и сериозни повреди на човековите права.
Политички застој во Вашингтон
Во меѓувреме, во Конгресот продолжува застојот околу финансирањето на DHS. Демократски извори наведуваат дека е малку веројатно да ја прифатат понудата на Белата куќа за ограничување на тактиките на ICE пред истекот на рокот за усвојување на буџетот.
Лидерот на републиканците во Сенатот, Џон Тјун, изјави дека привремениот закон за финансирање е единствениот начин да се избегне прекин на работата на министерството.
Дополнителни тензии предизвика и сведочењето на државната обвинителка Пем Бонди пред Комитетот за правосудство, каде што беа отворени прашања за објавување документи од случајот „Епштајн“, како и за истрагата поврзана со смртоносните пукања во Минесота.
Иако операцијата формално е завршена, политичката борба околу имиграциската политика во САД продолжува, а прашањето за финансирањето на безбедносните служби останува отворено.
Извор: Nova.rs
