Овој потег одразува поширок тренд на консолидација во пиварската индустрија, поттикнат од промената на навиките на потрошувачите и намалувањето на потрошувачката на алкохол во Европа.
Најстарата манастирска пиварница во светот, германската „Велтенбургер“, ќе биде продадена на производителот на пиво „Шнајдер Вајс“ од Минхен, што најверојатно претставува уште еден знак за консолидација во пиварската индустрија предизвикана од наглото намалување на потрошувачката на пиво во Германија.
Пивото се приготвува во опатијата „Велтенбург“, активен и историски значаен манастир на бреговите на Дунав во Баварија, речиси илјада години.
Иако зградата сè уште е во сопственост на Католичката црква, бенедиктинските монаси го препуштија самото производство на вработените во пиварницата „Бишофсхоф“, која исто така е вклучена во оваа продажба, пред околу педесет години.
Регенсбуршката епархија и компанијата „Шнајдер Вајс“ постигнаа договор по неколку години загуба на „Велтенбургер“, поради што Црквата беше принудена да ја одржува пиварницата со свои средства. Локалните медиуми објавуваат дека финансиската неодржливост била клучна причина за оваа одлука.
Управниот директор на „Велтенбургер и Бишофшоф“, Тил Хедрих, проценил дека преземањето ќе спречи затворање или распаѓање на пиварницата од страна на инвеститори без врска со регионот, а воедно ќе се зачува важен дел од баварската традиција на производство на пиво.
Деталите за финансискиот аранжман не се објавени, а завршувањето на трансакцијата е планирано до јануари 2027 година. Договорот предвидува задржување на сите 21 вработен во пиварницата „Велтенбургер“, што, според епископот од Регенсбург, Рудолф Водерхолцер, е од особено значење за локалната заедница и зачувувањето на работните места во регионот.
Пиварницата „Бишофшоф“, основана во 1649 година и со 56 вработени, ќе престане со производство до крајот на годината, додека нејзиниот бренд ќе биде интегриран во работењето на компанијата „Шнајдер Вајс“. Во исто време, производството на пивото Weltenburger ќе продолжи во историскиот манастир, додека епархијата бара решенија за работниците од Бишофсхоф кои ќе ги изгубат своите работни места.
Во соопштението, пиварницата Weltenburger потсети дека во текот на својата долга историја преживеала пожари, поплави, уништување, секуларизација и светски војни.
Падот на продажбата на пиво во Германија е дел од поширок тренд на намалување на потрошувачката на алкохол во западните земји. Според податоците од германското здружение на индустријата, продажбата на пиво се намалила за околу 25 проценти во последните 15 години, додека пад од пет милиони хектолитри е забележан само во 2025 година, што е најголем во последните 75 години.
Иако германскиот пазар сè уште се карактеризира со силна лојалност кон регионалните брендови и конкуренција помеѓу голем број мали и средни пивари, во глобални рамки Германија нема ниту едно пиво меѓу десетте најпродавани пива во светот.
И покрај ова, земјата сè уште е на врвот по бројот на манастирски пиварници – девет од нив ги водат монаси или нивни вработени, додека десеттата, во францисканскиот манастир Малерсдорф, ја водат калуѓерки кои продаваат само мал вишок пиво што самите не го консумираат.
