„Денеска официјално побарав од Владата на Косово да ги суспендира увозните царини за сите американски производи, како важен чекор кон продлабочување на економските врски со нашиот најблизок сојузник,“ изјави Османи, откако американскиот претседател Доналд Трамп воведе реципрочни царини.
Таа нагласи дека Косово е подготвено за посилни односи со САД, со јасна визија која ќе придонесе за поголема стабилност, безбедност и економски просперитет на двете земји.
„Овој чекор ќе отвори нови можности за создавање работни места, размена на технологии и долгорочен економски раст,“ напиша Османи на социјалната мрежа X.
Според неа, оваа одлука не е само економска, туку и надворешнополитичка, бидејќи ја потврдува трајната посветеност на Косово кон американско-косовските односи, кои се темелат на заеднички вредности и децениска поддршка.
Трамп воведе царини од 10% за Косово, 33% за Северна Македонија
Американскиот претседател Доналд Трамп вчера потпиша нова извршна наредба со која се воведуваат реципрочни царини за земјите ширум светот, вклучувајќи ги и оние од Западен Балкан.
Според соопштението на Белата куќа, најниски царини – од 10% – се воведени за производите што се извезуваат од Косово, Албанија и Црна Гора во САД.
Северна Македонија ќе биде погодена со царини од 33%, додека за Босна и Херцеговина тие ќе изнесуваат 35%. Србија е најпогодена во регионот, со царини од 37% на нејзините производи што се извезуваат во САД.
Овие мерки се дел од новиот трговски пристап на администрацијата на Трамп, кој предизвика силни реакции во меѓународната заедница и пад на берзите.
