Експпертите за безбедност често предупредуваат дека не постои максимална безбедност на интернетот и дека ако некој сака да ве хакне, голема е веројатноста дека ќе успее. На своја кожа тоа го почувствува и тогаш најбогатиот човек на светот, Џеф Безос, чиј iPhone беше хакиран преку WhatsApp.
Од Meta сега повторно предупредуваат дека дел од корисниците на WhatsApp се на удар на хакери кои користат шпионски софтвер на израелската компанија Paragon Solutions. Нападите беа откриени уште во декември минатата година, но не е познато кога точно дошло до хакирањето, односно инсталирањето на шпионскиот софтвер на телефоните. Наводно, биле хакирани околу 90 лица во повеќе од 25 земји, па WhatsApp започнал да контактира со лицата кои се нашле на мета на хакерите од минатата недела.
Согласно тоа што на удар се најмногу новинари и други лица поврзани со различни здруженија на граѓанското општество, претпоставката е дека зад нападите стојат влади на непознати држави. Владите на земјите веќе се клиенти на Paragon Solutions и нивниот софтвер кој, барем така тврдат од оваа израелска компанија, се користи за борба против криминалот и заштита на националната безбедност.
Особено загрижувачко е тоа што лицата кои биле хакирани, не само што немаат причина да посомневаат дека некој шпионира нивните уреди, туку тие дури и не мораат да кликнат на некој сомнителен линк или да посетат опасна страница за да се инсталира шпионскиот софтвер на нивниот телефон. На сите нив им бил испратен електронски документ за кој не била потребна никаква интеракција, односно не морале да го отворат за да дојде до инсталирање на софтверот на телефоните.
А еднаш кога тој софтвер ќе стигне на телефонот, хакерите преку него имаат целосен пристап до уредот и целиот негов содржина, што вклучува и пристап до примени и испратени пораки, дури и ако се шифрирани, како што е случајот со комуникацијата на WhatsApp.
Од компанијата на Цукерберг коментирале дека ќе продолжат да го заштитуваат своите корисници за да можат и понатаму да комуницираат приватно, но како што објасни експертот за безбедност Џон Скот-Рејлтон, токму овие ситуации се потсетник дека на пазарот постојат шпионски софтвери кои, очигледно, се сè повеќе користат и претставуваат голема закана.
