Со концертот „Будење“, Македонската филхармонија вечерва во 20 часот ќе ја отвори новата концертна сезона. Солистички ќе настапи еден од најдобрите виолинисти Барнабаш Келемен од Унгарија, а диригент е Бенџамин Шварц од Израел/САД. На програмата се Концертот за виолина и оркестар бр. 2 од Бела Барток и Извадоци од балетот „Ромео и Јулија“ од Сергеј Прокофјев.
Келемен ги освои најпознатите концертни сцени во светот со својата виртуозна техника и динамика, како и со страсниот изведувачки стил. Различен и со отворен ум, тој важи за исклучителен солист и камерен музичар, како и уметнички директор на фестивали и професор на водечки музички институции.
– Во последните неколку години, Келемен работи и како диригент. Поседува филигранско чувство за креирање стил и поседува неверојатна техничка подготвеност која му дава сигурност да изведува комплексни дела од виолинската литература. Неговиот репертоар е диверзитетен, изведува дела од раниот барок, класиката, дела од романтизмот, како и современа музика – велат од Филхармонијата.
Бенџамин Шварц е диригент високо ценет и од критиката и од публиката токму поради неговата исклучителна музикалност и интензитет во процесот на создавање на музиката, чистата музичка мисла и визија, проткаени во неговите фантастични интерпретации. Овие квалитети заедно со широкиот репертоар на дела произлегуваат од неговиот континуиран порив за истражување и проширување на индивидуалните звучни хоризонти. Од 2013 до 2016 година работи како музички директор на Филхармонискиот оркестар на Вроцлав, Полска. Работел и како гостин-диригент на Филхармонијата на Дисбург (2019/2020), бил гостин-диригент на Симфонискиот оркестар на Сан Франциско и музички директор на Младинскиот оркестар во овој американски град. Репертоарот на Шварц го рефлектира неговиот антидогматски, отворен однос кон програмата и делата од различни епохи и стилови – од делата на Џон Адамс до Малер, Брамс, Барток итн.
