Како дел од серијалот „Нова пролет“, со кој Канал 103 одбележува 34 години постоење, во понеделник на втори јуни, ќе се одржи концерт на Zelzeleh – иновативна соработка помеѓу иранскиот пејач и композитор Kamyar Arsani (Faraway Ghost) и индискиот перкусионист и продуцент на електронска музика Ravish Momin (Sunken Cages).
Концертот ќе се одржи во Ла Кања со почеток во 21.00 часот.
Zelzeleh, што на персиски значи „земјотрес“, е проект кој навистина го оправдува своето име, рушејќи ги конвенционалните бариери. Нивната музика е непредвидлива фузија на персиска ритмика, суфи мистицизам, живите ритми од улиците на Мумбаи и современа електроника. Евокативниот вокал на Arsani, кој ја спојува традиционалната експресивност со панк-рок енергија, беспрекорно се преплетува со мајсторството на Momin во полиритмичкиот live-looping и електронските перкусии. Резултатот е звук што тие го нарекоа „дигитална суфи музика“.
Во ноември 2024 година, Zelzeleh го објавија својот деби албум, „Ashk Haye Moghavemat“ (Солзи на отпор), за француската издавачка куќа Akuphone. Овој албум е моќен и трогателен омаж на глобалната борба против угнетувањето. Песната “Threnody for the Children” е дело – химна посветена на илјадници деца убиени во Појасот Газа.
