Маестро Симон Трпчески заедно со квинтетот „Македонисимо“ на 20 декември во арена „Борис Трајковски“ во Скопје ќе одржат концерт, кој ќе биде посветен на 25-годишнината од неговата уметничка кариера.
Како што најавија организаторите, во соработка со Националната опера и балет, под диригентство на маестро Сашо Татарчевски, концертот ќе биде спој на уметност, традиција, емоција и врвна интерпретација. Заедно со квинтетот „Македонисимо“ и специјални гости, Трпчески ќе нè однесе на патување низ музиката кое ќе ги надмине жанровите и границите.
-По минатогодишниот фантастичен концерт во арена „Борис Трајковски“, кога Симон Трпчески ја наполни салата до последно место и ги остави присутните без здив, годинава тој се враќа со јасна причина за славење. 25 години врвна музичка кариера, исполнета со настапи на најпрестижните сцени, соработки со елитни оркестри и интерпретации што оставаат траен печат. Пат исполнет со непоколеблива посветеност кон уметноста, со страст што не згаснува и со визија што постојано се надградува. Јубилеј што сведочи за храброста да се остане верен на сопствениот израз, дури и кога тој го менува светот околу себе, се вели во соопштението за претстојниот концерт.
Настанот е во организација на „Прагма продукција“.
