За многумина, викендот претставува идеална можност за вистински одмор и надополнување на сонот изгубен во текот на работната недела. Но, според мислењето на експертите, не е доволно само да спиеме подолго — постои препорачан број на часови што овозможуваат квалитетна регенерација на телото и умот.
Како што пренесува BBC, најдобро е за време на викендот да се спие помеѓу седум и девет часа. Доколку во текот на неделата имате сериозен недостиг од сон, може да се толерира и нешто подолго спиење, но со внимание и во разумни граници.
Зошто е важен сонот?
Спиењето не е само рутина, туку клучен физиолошки процес што му овозможува на организмот да се обнови. За време на сон: се регенерираат мускулите и органите, се стабилизираат функциите на мозокот и се подобрува менталната и физичката состојба.
Хроничен недостиг од сон, особено ако редовно спиете помалку од 7 часа, може да го зголеми ризикот од дебелина, дијабетес, висок крвен притисок и срцеви заболувања.
Дали постои „премногу“ сон?
Иако можеби звучи привлечно да се одспие цел викенд, експертите предупредуваат дека спиењето повеќе од девет часа на ноќ не е препорачливо. Тоа може да биде показател за: нарушувања во сонот, хронична исцрпеност, па дури и депресија.
Во такви случаи, советуваат лекарска консултација и анализа на животниот стил.
Викендот е шанса за опоравување, но тоа не значи да спиеме без граници. Најдобро е да се придржуваме до 7 до 9 часа сон, што ќе овозможи вистинска релаксација, подобро здравје и повеќе енергија за претстојната недела.
