Многу рецепти, особено за десерти, бараат јајца на собна температура, па затоа некои луѓе ги оставаат надвор од фрижидер. Сепак, важно е да се знае колку долго тоа е безбедно и кои се ризиците.
Јајцата што претходно биле чувани во фрижидер може да стојат на собна температура најмногу до два часа. Ако температурата во просторијата е повисока од 30 степени, овој период се скратува на околу еден час. По тоа време значително се зголемува ризикот од развој на бактерии, па се препорачува јајцата веднаш да се употребат или повторно да се стават во фрижидер.
Проблемот не е само топлината, туку и наглата промена на температурата. Кога ладни јајца се оставаат надвор, може да се создаде кондензација на лушпата, што овозможува полесно навлегување на бактерии во внатрешноста.
Во Европа, вклучително и кај нас, јајцата не се мијат пред продажба, со што го задржуваат природниот заштитен слој. Иако во продавниците често стојат на собна температура, дома се препорачува да се чуваат во фрижидер бидејќи ниските температури го забавуваат развојот на бактерии и ја продолжуваат свежината.
Свежите домашни јајца, доколку не се измиени, може да се чуваат на ладно и суво место од една до две недели. За подолг рок, најдобро е да се стават во фрижидер, каде може да останат свежи до пет недели. Доколку еднаш биле ставени во фрижидер, не треба повторно да стојат надвор подолго од два часа.
За намалување на ризикот од салмонела, важно е јајцата да се чуваат на ниска температура, да не се користат оштетени јајца и да се одржува добра хигиена при подготовка на храна. Термичката обработка е особено важна, особено за чувствителни групи.
Најбезбедно правило е јајцата да не стојат надвор од фрижидер повеќе од два часа, односно еден час во топли услови.
