Колку деца исчезнуваат во Европа секоја година?
Бројот на пријави за исчезнати деца се удвои помеѓу 2023 и 2024 година. Повеќе девојчиња се пријавуваат исчезнати отколку момчиња. Минатата година преку виртуелните канали, Missing Children Europe (MCE), федерацијата која се занимава со исчезнати и сексуално експлоатирани деца, пристигнале над 124.000 пријави за деца кои исчезнале.
Тоа е речиси двојно повеќе отколку во 2023 година. Федерацијата не објаснува што точно предизвика овој значителен раст. Пријавите може да се направат преку телефонски линии, текстуални пораки, е-пошта, разговор преку интернет и социјални мрежи. Извештајот ги користи податоците од 22 европски земји, вклучувајќи Финска, Франција, Полска, Шпанија, Албанија и Обединетото Кралство.
Повеќето исчезнати деца ги наоѓа полицијата, а втор начин на наоѓање е кога децата сами се враќаат.
Во последните две години, 67% од евидентираните случаи се со деца кои или избегале или биле натерани да го напуштат домот или установите за згрижување. Средната возраст на децата кои исчезнуваат, според 18 линии за пријави кои можеле да дадат такви податоци, е меѓу 12 и 16 години, што покажува дека адолесцентите се најризични.
Зошто децата исчезнуваат и колку време трае да се најдат?
Проблемите дома и во установите, како и злоупотребата на дрога или алкохол, се меѓу најчестите причини пријавени преку линиите. Потоа следуваат менталното здравје, проблемите во училиштето, и злоупотреба или експлоатирање (grooming). 6 од 10 деца кои побегнале се девојчиња.
Сепак, според Белгија, споредба на податоци од телефонските линии и полицијата покажала можно потценување на исчезнувањето кај момчињата во споредба со девојчињата.
Повеќето деца кои избегаа се најдени за помалку од една недела (78%), додека 15% се пронајдени помеѓу една недела и еден месец по исчезнувањето, според 11 телефонски линии на MCE.
Податоците од истите линии покажуваат дека едно дете е пронајдено мртво.
Исчезнувања на деца мигранти
Случаите на деца кои исчезнуваат во миграција малку се зголемија во 2024, на 7%. Но, MCE предупредува дека нема комплетни податоци за овие деца, што го ограничува разбирањето колку точно исчезнуваат.
Во таквите случаи, повеќе момчиња отколку девојчиња исчезнуваат, што е поврзано со тоа што има повеќе машки мигранти и баратели на азил. Просечната возраст на децата што исчезнуваат како мигранти е помеѓу 12 и 17 години, според девет линии за пријави.
Според податоци од пет телефонски линии, 69 од овие деца биле пронајдени живи, 46 од нив за помалку од една недела, и 3 деца биле пронајдени помеѓу еден месец и 12 месеци по исчезнувањето. Мароко, Авганистан, Алжир и Сирија се најчестите земји на потекло за деца кои исчезнуваат за време на миграцијата
