Ирскиот актер Колин Фарел ги истрча последните четири километри од маратонот во Даблин заедно со пријателката Ема Фогарти, која живее со ретка болест на кожата.
Фарел, кој се врати во својата родна Ирска за да учествува на маратонот, имаше цел да собере средства за ирската добротворна организација DEBRA, која ги поддржува луѓето кои, како и Фогарти, имаат неизлечива генетска состојба epidermolysis bullosa.
Ема Фогарти е најстарата личност во Ирска со оваа состојба, според новинската агенција PA Media. Ема е родена без кожа на левата нога и десната рака и може да добие многу болни плускавци дури и од најмал допир. Таа наполни 40 години во јуни, возраст за која мислела дека никогаш нема да ја достигне, бидејќи е родена со најтешката форма на болеста. Затоа Ема и Колин се обврзаа да го истрчаат маратонот во Даблин заедно.
„Ја познавам Ема долги години и таа е олицетворение на храброста и чистата решителност“, истакна Фарел.
„Напорот на трчање е ситница во споредба со болката што Ема ја поднесува секој ден, иако не го покажува тоа. Ми беше чест да ја видам како ме чека на четири километри до крајот, каде што секој од нив претставуваше една деценија од нејзиниот живот. Никогаш нема да го заборавам овој момент“, објасни Фарел откако го истрча маратонот за нешто повеќе од четири часа.
Ема истакна дека учеството на маратонот е остварување на сонот и дека е благодарна на Колин, кој ѝ е најверниот пријател.
„Тој секогаш го покажувал своето сочувство и емпатија за луѓето кои живеат со оваа болест и е вистински шампион во моите очи. Трчањето маратон никогаш не е лесно, но штом се посвети на тоа, немаше враќање назад, тој е човек од збор“, изјави Ема.
На луѓето со кожа на пеперутка им недостасуваат есенцијални протеини кои ги поврзуваат слоевите на кожата, што значи дека дури и најмало триење или движење може да предизвика пукање или пликови на кожата.
Ема Фогарти, која е амбасадорка на ДЕБРА, има слоеви на завои на 80 проценти од нејзиното тело за да спречи потенцијални инфекции.
Ема и Колин првично планираа да соберат 400.000 евра за добротворната организација, но сега се стремат да достигнат граница од 1 милион евра. Според податоците од веб-страницата на организацијата, тие поминале три четвртини од тој пат. Претходно оваа година, Колин Фарел основаше фондација која го носи неговото име за поддршка на семејства со возрасни деца со интелектуална попреченост. Неговиот син Џејмс е роден со Ангелман синдром, ретко неврогенетско нарушување.
