Додека трошоците за образование во Европа постојано растат, јавните инвестиции во образованието од страна на земјите членки на ЕУ се во опаѓање.
Според податоците на Евростат, просечното учество на трошоците за образование во БДП на ниво на ЕУ е 4.66% – најниско ниво од 2013 година наваму. Овие податоци ги опфаќаат сите нивоа од предучилишно до високо образование.
На дното на листата се наоѓа Хрватска, која троши само 1.54% од својот БДП на образование, а веднаш по неа следуваат Романија, Србија и Турција. Хрватска, исто така, е земја со најголемо намалување на буџетот за образование – пад од 2.38% меѓу 2019 и 2022 година.
На спротивниот крај, Шведска е лидер во Европа со речиси 7% од БДП инвестирани во образование, проследена од Исланд и Белгија со над 6%, а Финска и Данска се веднаш зад нив.
Кога станува збор за распределбата на јавните трошоци во образованието, најголем дел оди за основно и пониско средно образование (40.6%). Следи високото образование (26.3%). Потоа повисоко средно образование (21.6%), а најмал дел се издвојува за предучилишно образование (11.4%).
Колкава е просечната годишна помош за ученици и студенти во Европа?
Образовната поддршка низ Европа се доделува во различни форми – стипендии, кредити и надоместоци за ученици и родители.
Најмногу помош добиваат учениците во повисоко средно образование – околу 1.766 евра по ученик годишно, додека учениците во основно образование добиваат многу помалку – само околу 533 евра годишно.
Но овие просеци кријат големи разлики меѓу земјите.
Најдарежливи се Норвешка и Данска, кои доделуваат повеќе од 8.000 евра годишно по дете во повисоко средно и високо образование.
Од друга страна, најмалку помош доделуваат Грција, Хрватска и Чешка.
Во најголем дел од земјите, помошта доаѓа во форма на стипендии. Меѓутоа, во Холандија, Шведска, Норвешка и Исланд најголем дел од образовната поддршка се доделува преку студентски кредити.
