Сѐ поголем дел од животот на Европејците се одвива преку паметни уреди поврзани со интернет. Според најновите податоци на Eurostat, во 2024 година дури 70.9% од граѓаните на ЕУ користеле барем еден уред од т.н. „Интернет на нештата“ (IoT).
На врвот на листата со највисока застапеност се наоѓаат: Холандија со импресивни 94.8%, Ирска со 90.6% и Данска со 87.0%.
На другата страна се земји како Полска (46.1%), Бугарија (50.8%) и Романија (56.6%), каде значително помал дел од населението користи вакви уреди.
Најчесто користени уреди
Меѓу сите интернет-поврзани уреди, интернет телевизорите се најраспространети, со 57.9% од испитаниците кои потврдиле дека користат такви уреди. Следуваат паметни носливи уреди, како паметни часовници и фитнес тракери (29.9%), гејминг конзоли и паметни аудио системи (околу 20%) и виртуелни асистенти преку паметни звучници (16.0%).
Уредите за автоматизација на домот се помалку застапени, со 14.2% кои користат енергетски менаџмент системи, 12.8% паметни апарати и 11.8% безбедносни уреди за домот.
Исто така, 10.5% од граѓаните поседуваат автомобил со вграден интернет, а 7.9% користат здравствени IoT уреди. Интересно е што само 2.3% пријавиле користење на играчки поврзани на интернет, што укажува на потенцијал за раст во тој сегмент.
Возраста игра важна улога
Употребата на интернет-поврзани уреди значително варира меѓу различни возрасни групи. Најмладите, односно лицата на возраст од 16 до 24 години, се најактивни – 84% од нив користеле барем еден IoT уред. Наспроти тоа, кај постарите од 65 до 74 години, тој процент паѓа на 45%.
Кај младите, најчести уреди се: интернет ТВ (67%), паметни часовници и фитнес тракери (40%), гејм конзоли (40%), паметни звучници (26%) и виртуелни асистенти (23%).
Овие податоци покажуваат дека технолошките навики се длабоко поврзани со возраста, достапноста и развојот на дигиталните вештини, но и дека европските граѓани брзо го прифаќаат концептот на „паметен живот“.
