Студентскиот протест на плоштадот Славија, според проценката на Архивот на јавни собири, е убедливо најголемиот протест во Србија. Архивот на јавни собири утврдил дека на протестот, кој го организираа студентите на Славија, се собрале помеѓу 100.000 и 102.000 луѓе. Тоа е најголемиот број демонстранти на едно место од 1991 година до денес.
Целиот свет имаше можност на плоштадот Славија да види како изгледа кога студентите во Србија ги повикуваат граѓаните на протест, пишува nova.rs.
Реки од луѓе со транспаренти, свирчиња се слеваа до плоштадот Славија, а на студентите им се приклучија и земјоделци, просветни работници, пензионери и многу јавни личности. Сите тие испратија порака дека студентските барања сѐ уште не се исполнети.
Студентите ја продолжуваат својата борба, а блокадите на факултетите нема да бидат крај. Протестот што го организираа на 22. декември ги стави на победничка позиција.
Рекордот во бројот на демонстранти до синоќа го држеше протестот од 5. октомври 2000. година, кога беше срушен режимот на Слободан Милошевиќ.0
Тој ден цела Србија се слеа во Белград за да му испрати порака на Милошевиќ и на неговиот режим дека е „готов“, откако тој одби да ги признае резултатите од изборите за претседател на СР Југославија.
„Косово е Србија“ – 2008 година, е на трето место по бројност
На митингот „Косово е Србија“, кој се одржа на 21. февруари 2008 се собраа помеѓу 60.000 и 80.000 граѓани пред Собранието на Србија, пишува Архивот на јавни собири.
Во тој период се одржаа низа протести поради незадоволството во врска со декларацијата за независност на Косово. Како што тогаш пишуваше, „Време“, тој ден дојде и до ескалација на насилството.
„Светот чека да види дали демонстрациите од четвртокот (21. февруари) беа последниот изблик на бес во Србија или првиот потрес во новиот балкански земјотрес. Големо разочарување, дури и на најпроевропски ориентираните Срби, наговестува дека помирувањето по прогласувањето на независноста на Косово нема да биде едноставно“, пишуваше тогаш и „Њујорк тајмс“.
Според Архивот на јавни собири, на списокот се најде и дочекот на Нова 1997. година по Јулијанскиот календар во Белград, организиран како дел од тримесечните протести на опозицијата против кражбата на локалните избори. Организатори беа, повторно, студентите, но и коалицијата „Заедно“. Тогаш на Плоштадот Република се собрале помеѓу 50.000 и 60.000 граѓани.
Србија против насилството
Сериите на протести од минатата година „Србија против насилството“ дефинитивно се на списокот на најмасовни. Така, според процените на архивот, на третиот и на петтиот протест биле до 60.000 луѓе.
Како што тогаш пишуваше Нова, Белградот беше преплавен со воскликот „Вучићу, оди!“. И студентите тогаш испратија порака дека „не молчат“ и повикаа на следните протести.
Протести од 90-те
Освен овие собири, на списокот се и деветомартовските демонстрации од 1991. година, кога на улиците на Белград беа околу 30.000 луѓе. Веднаш по овие протести се случи и Плишаната револуција кај Терезијската чешма, кога се собраа околу 20.000 граѓани. Архивата на јавни собири потсетува дека се работи за „маратонски четиридневни деноноќни студентски и граѓански протести поради настаните поврзани со демонстрациите на 9. март 1991. година“.
Неколку години подоцна, точна 4. декември 1996. се случи и познатиот масовен протест поради “вода во коаксијалниот кабел”, кога на улиците беа помеѓу 45.000 и 50.000 граѓани.
Како што е наведено на сајтот на архивата, „протестната колона поминуваше покрај зградата на Политика 75 минути, што значи дека ова е вториот најдолг протестен марш во историјата на Србија“.
Да потсетиме, некаде на половина од протестот на Славија во неделата стигна информацијата од Министерството за внатрешни работи дека на Славија „во време на најголема присутност на протестот било помеѓу 28.000 и 29.000 граѓани“.
Меѓутоа, Архивот на јавни собири практично веднаш го демантираше МУП, објавувајќи дека реалниот број е значително поголем.
„Демонстрантите зазеле површина од околу 45.000 квадратни метри, што значи дека бројот на присутни бил помеѓу 2 и 3 пати поголем од официјалната проценка на МУП“, се изјави за време на протестот, а по неговото завршување Архивот на јавни собири издаде соопштение:
„На основа на достапните снимки и фотографии, Архивот на јавни собири утврди дека на протестот, кој го организираа студентите на Славија, се собрале помеѓу 100.000 и 102.000 луѓе. Снимките што беа користени за броење на учесниците беа направени помеѓу 16:45 и 17:00 часот“.
