Според најновото истражување на пазарот на паметни телефони, вкупно 296,9 милиони уреди биле испорачани во првиот квартал од 2025 година, само 0,2% повеќе во однос на истиот период минатата година.
Како што открива „Каналис“, испораките се зголемија во Кина и САД, но се намалија во Индија, Европа и Блискиот Исток.
Падот во Индија, Латинска Америка и Блискиот Исток укажува на заситеност на пазарот. Иако во тие региони беше забележана поголема продажба во текот на четвртиот квартал од 2024 година, потрошувачите не беа толку склони да купуваат нови уреди во првиот квартал од оваа година. Во Европа, трговците на мало се соочуваат со големи залихи на премиум модели од крајот на минатата година и прекини во снабдувањето со уреди од средна и ниска класа поради новите правила на ЕУ што стапуваат на сила во јуни оваа година.
Во Африка, побарувачката и проактивните мерки од страна на производителите на паметни телефони го поттикнаа растот на продажбата. Компании како „Виво“ и „Хонор“ забележаа двоцифрен раст на странските пазари. Во исто време, „Хонор“ како целина забележа рекорден број испораки надвор од Кина, според аналитичарите.
„Епл“ ги зголеми испораките на своите паметни телефони за американскиот пазар пред новите увозни тарифи за да избегне дополнителни трошоци. Иако поголемиот дел од iPhone телефоните сè уште се произведуваат во Кина, до крајот на кварталот компанијата го зголеми производството на моделите iPhone 15 и iPhone 16 во Индија, како и производството на моделот iPhone 16 Pro.
Најпопуларните брендови на телефони во првиот квартал од 2025 година
Кога станува збор за пазарен удел, Samsung ја задржа својата водечка позиција во првиот квартал од 2025 година, со удел од 20% (испорачани 60,5 милиони телефони). По него следува Apple со 19% (55 милиони уреди), што главно се должи на зголемувањето на залихите во март. Xiaomi остана на третото место со 14% (41,8 милиони телефони), додека Vivo и Oppo ја заокружија првата петорка со 22,9 и 22,7 милиони испорачани уреди, соодветно 8% секој.
„Каналис“ истакнува дека големите брендови остануваат „оптимисти“ во врска со закрепнувањето на пазарот во вториот квартал. Пониските нивоа на залихи и лансирањето на нови производи треба да ги подобрат резултатите од продажбата, но конкуренцијата во средниот ценовен сегмент (уреди во опсег од 200 до 400 долари) ќе станува сè пожестока. Аналитичарите, исто така, веруваат дека ескалацијата на тензиите во глобалната трговија би можела да ги принуди земјите да го локализираат производството на паметни телефони, што ќе бара дополнителни инвестиции и намалување на трошоците.
