Пет новинари на Ал Џазира, кои уредништвото ги опиша како „последните преостанати гласови од Газа“, загинаа во израелски воздушен напад врз шатор во близина на болницата Ал Шифа. Загинаа дописниците Анас Ал-Шариф и Мохамед Креикех, снимателите Ибрахим Захер и Моамен Алива, како и асистентот Мохамед Нуфал.
Израелската војска тврди дека Анас Ал-Шариф бил водач на терористичка ќелија на Хамас и дека „се претставувал како новинар“ – тврдења што тој самиот, Ал Џазира и Комитетот за заштита на новинари (CPJ) ги одбиваат. Ал Џазира го нарекува убиството „целенасочена ликвидација“ и истакнува дека се работи за новинари кои известувале од првата линија на разурнување.
Еден од најпознатите новинари
Кој беше Анас Ал-Шариф? Ал-Шариф (28) стана едно од најпрепознатливите лица во Газа од почетокот на војната меѓу Израел и Хамас во октомври 2023 година. Роден е во бегалскиот камп Џабалија, дипломирал новинарство на Универзитетот Ал Акса, а пред работа во Ал Џазира работел во локални медиуми. Извештувал главно од северниот дел на Газа за животот под воздушните напади, гладот и разурнувањето. Неговите емотивни настапи, вклучително и моментот кога во живо заплака сведочејќи за жена која паднала од глад, му донесоа милиони следбеници на социјалните мрежи.
Ал-Шариф беше дел од тимот на Ројтерс кој во 2024 година ја доби Пулицеровата награда за фотографија, а го преживеа сопругата и двете деца.
Останатите загинати новинари
Мохамед Креикех (33), дописник од Газа, дипломирал новинарство на Исламскиот универзитет во Газа. За време на војната, како и Ал-Шариф, бил одделен од семејството, а нивната средба по примирјето стана вирална поради нивната првична збунетост. Снимателот Ибрахим Захер (25) и асистентот Мохамед Нуфал (29) исто така се од кампот Џабалија, додека за Моамен Алива нема многу информации.
Во нападот загинаа уште две лица, меѓу кои и фриленсерот Мохамед ал-Халди.
„Висока цена за слободната реч“
Канцеларијата за човекови права на ОН го осуди нападот како „тешко кршење на меѓународното хуманитарно право“ и повика Израел да ги заштити цивилите, вклучително и новинарите. CPJ наведува дека до 5 август во Газа биле убиени најмалку 186 новинари, а Хамас тврди дека бројот на убиени палестински новинари е уште поголем.
Израелската војска тврди дека има документи кои ја докажуваат поврзаноста на Ал-Шариф со Хамас, но CPJ нагласува дека никогаш не биле претставени убедливи докази. Ал Џазира го обвинува Израел дека се обидува „да ги изгаси гласовите кои откриваат планирана окупација на Газа“ и ги повикува меѓународната заедница да го запре „целенасоченото убиство на новинари“.
Директорот на новинската служба на Ал Џазира English, Салах Негм, изјави дека изјавата на израелските одбранбени сили (IDF) е „признавање на вина“ и порача: „Ако државата и целата армија ги прогонува новинарите затоа што си ја работат работата, малку можеме да направиме. Но, знаеме дека се плаќа висока цена за слободната реч и независното известување.“
