Кофеинот може делумно да ги ублажи последиците од недостаток на сон, покажува ново истражување, но научниците предупредуваат дека не може целосно да го замени одморот.
Истражувачки тим од Националниот универзитет во Сингапур открил дека кофеинот помага во обновување на комуникацијата меѓу невроните и ја подобрува меморијата кај глувци лишени од сон. Фокусот бил ставен на регијата CA2 во хипокампусот – дел од мозокот кој има важна улога во учењето и паметењето.
Во експериментот, глувците добивале кофеин во текот на седум дена, по што биле изложени на неколкучасовна депривација на сон. Резултатите покажале дека недостатокот на сон ја нарушува невронската комуникација и доведува до проблеми со меморијата, но кофеинот значително ги ублажува овие ефекти.
Кога кофеинот бил внесен пред лишувањето од сон, се забележало обновување на синаптичката активност и подобрување на способноста за паметење. Истовремено, кај глувците кои спиеле нормално, не биле забележани негативни ефекти од кофеинот.
Научниците посочуваат дека недостатокот на сон директно влијае на мозочните функции, а кофеинот може привремено да помогне во нивна стабилизација на биолошко ниво. Сепак, тие нагласуваат дека ова не значи дека кофеинот може да го замени квалитетниот сон.
Истражувањето отвора нови прашања за врската меѓу спиењето и меморијата, но исто така укажува дека се потребни дополнителни студии за да се потврдат ефектите кај луѓето.
