Покрај тоа што се вкусни, тие содржат изобилство на растителни влакна кои се клучни за добра дигестија, стабилно ниво на шеќер во крвта и долготрајно чувствo на ситост. Едно јаболко со средна големина содржи околу 4 до 5 грама влакна, што значително придонесува кон препорачаната дневна доза од 25 до 38 грама. Сепак, според нутриционистите, не е сеедно кога консумираме јаболка – утрото е најдобриот избор, пишува EatingWell.
Утрото е идеално време за јаболко
„Иако нема строго определено време кога е најдобро да се јаде јаболко, истражувањата сугерираат дека утрото може да биде најповолниот период за максимална корист од влакната,“ објаснува диететичарката Ејвери Зенкер. Таа додава дека додавањето парчиња јаболко во утринската овесна каша или смути е едноставен начин за здрав и избалансиран почеток на денот.
Зошто е добро да се јаде јаболко наутро
Телото најдобро реагира на внесот на влакна во утринските часови, бидејќи тогаш цревата се најактивни – усогласени со нашиот биолошки часовник, односно циркадијалниот ритам. Јаболките содржат две главни видови влакна:
- Нерастворливи влакна – го зголемуваат волуменот на столицата и поттикнуваат редовна дигестија.
- Растворливи влакна, особено пектинот – создаваат гелеста структура која го олеснува движењето низ цревата и ги хранат добрите бактерии.
Подобра регулација на шеќерот и подолга ситост
Иако имаат природна слаткост, јаболките не предизвикуваат нагли порастови на шеќерот во крвта. Пектинот ја забавува дигестијата и помага да се одржи стабилно ниво на гликоза. Затоа јаболките често се препорачуваат за лица кои сакаат да спречат развој на дијабетес тип 2.
Дополнително, влакната во јаболките го продолжуваат чувството на ситост, што придонесува за подобра контрола на апетитот и телесната тежина. Стручњаците советуваат да се изеде едно јаболко 10 до 15 минути пред оброк – така побрзо ќе се почувствува ситост и ќе се изеде помалку храна.
Како да се зголеми внесот на влакна
Јаболкото дневно е одличен почеток, но за оптимален внес на влакна корисно е исхраната да се збогати и со други намирници:
- Грав и леќа – содржат до 8 грама влакна во половина шолја.
- Семки од лен – додавањето во овесна каша или јогурт обезбедува дополнителни 4 грама влакна.
- Целозрнести житарки и интегрален леб – имаат повеќе влакна од белите верзии.
- Лиснат зеленчук како кељ, спанаќ или блитва – може да се додаде во сендвичи, омлети, супи или смутија.
Со други зборови, утринското јаболко не е само симбол на здравје – тоа е паметен и природен начин за подобрување на дигестивното здравје и општата благосостојба.
Извор: Index.hr
