Загрижувачка студија покажала дека лицата кои пијат еден вид алкохол се особено изложени на ризик од дебелеење и болести поврзани со тоа.
Истражувачи во САД испитале повеќе од 1.900 возрасни лица за да откријат колку и кои алкохолни пијалаци консумираат. Испитани се лица кои пијат само пиво (38,9%), само вино (21,8%), само жешки пијалаци (18,2%) или комбинација од различни видови алкохол (21%), пишува „Експрес“.
Нивните навики на исхрана потоа се споредени во однос на Индексот на здрава исхрана, мера која се користи за определување на вкупниот квалитет на нечија исхрана.
Студијата покажала дека ниту една од овие групи не постигнала резултат над 80, што би укажувало на „адекватна исхрана“, но една група се издвојила како најлоша по овој критериум.
Лицата кои пијат вино имаат просечен резултат од околу 55 поени, додека оние кои пијат жешки пијалаци и оние кои пијат комбинација од различни пијалаци имале просечно околу 53 поени. Меѓутоа, пивопиите биле на најслабата позиција со 49 поени.
Пивопиите се, според истражувачкиот тим, најмногу изложени на ризик од дебелеење, бидејќи во просек имале најголем дневен внес на калории и најмалку вежбале. Овие лица исто така често се помлади, пушачи и имаат пониски приходи.
Па, ако ви е важна вашата линија, најдобро е да избегнувате алкохол, а особено пиво.
