Со тоа, кардинал Фарел ја презеде една од најзначајните улоги во Католичката црква – улогата на камерленго, личноста која го води Ватикан за време на т.н. „Apostolica Sedes Vacans“ – периодот меѓу смртта или оставката на папата и изборот на негов наследник.
Папата Франциск го назначи Фарел за камерленго во 2019 година. Во оваа улога, тој ќе биде клучен во спроведувањето на сите церемонии поврзани со последното збогување со папата Франциск, како и во подготовката за избор на нов папа.
Кој е Кевин Фарел?
Кардинал Кевин Фарел е роден во 1947 година во Даблин, Ирска. Студирал во Шпанија и во Рим, а потоа преку различни мисионерски и пасторални улоги, кариерата го однела и во Мексико и во САД. Бил капелан на Универзитетот во Монтереј, а служел и во парохија во Мериленд.
Повеќе од 30 години од својот живот ги минал во САД, а во 2007 година бил назначен за бискуп на Далас. Во 2016 година, папата Франциск го поканил во Ватикан како прв човек на новоформираниот оддел за пасторална грижа за семејствата, а истата година Фарел бил прогласен за кардинал.
Во 2023 година, папата му довери уште две важни улоги – претседател на Врховниот суд на Ватикан и претседател на Комисијата за доверливи прашања.
Што следува сега?
Како камерленго, Фарел има задача да организира сè околу конклавата – процесот на избор на нов папа. Тој исто така ќе го потврди официјално документот за смртта на папата Франциск и ќе биде дел од церемонијата на полагање на телото во ковчег, по што ќе ја предводи поворката од резиденцијата Домус Санта Марта до базиликата „Свети Петар“.
Според најавите од Ватикан, оваа церемонија може да се одржи веќе во среда наутро.
Интересен факт: Во историјата, само двајца камерленго-кардинали станале папи – Папата Лав XIII (1878) и Папата Пиј XII (1939).
