Претходно сокриените имиња на проширената мрежа на пријатели и деловни соработници на обесчестениот финансиер и сексуален престапник Џефри Епстин беа откриени оваа недела во форма на речиси 1.000 страници судски записи, кои беа објавени во средата.
Многу имиња на овие соработници и оние во потесниот круг на Епстин – кој почина во затвор чекајќи федерални обвиненија за сексуална трговија во 2019 година – претходно беа избришани од судските документи.
Во пресрет на објавувањето на документите, социјалните мрежи беа преполни со шпекулации за тоа што ќе се покаже.
Кој беше Џефри Епстин?
Милионерот беше познат по дружењето со познати личности, политичари, милијардери и ѕвезди. Епстин првично беше уапсен во Палм Бич, Флорида, во 2005 година, откако беше обвинет дека плаќал на 14-годишно девојче за секс.
Десетици други малолетни девојчиња опишаа слично сексуално злоставување, но обвинителите на крајот му дозволија на финансиерот да се изјасни за виновен во 2008 година по обвинението за една жртва. Тој одлежа 13 месеци во затворска програма со работа.
Некои познати личности кои биле блиски со Епстин се оддалечија од него по неговото осудување, вклучително и поранешните претседатели Бил Клинтон и Доналд Трамп, но многумина не. Епстин продолжи да се меша со богатите и славните уште една деценија, често преку филантропска работа.
Известувањето на Мајами Хералд го обнови интересот за скандалот, а федералните обвинители во Њујорк го обвинија Епстин во 2019 година за сексуална трговија. Тој се самоуби во затвор додека чекаше судење.
Обвинителството од Менхетен потоа ја гонеше поранешната девојка на Епстин, Гислајн Максвел, за помагање во регрутирањето на неговите малолетни жртви. Таа беше осудена во 2021 година и отслужува 20-годишна затворска казна.
Што се објавените документи?
Документите што се објавени се дел од тужбата поднесена против Максвел во 2015 година од една од жртвите на Епстин, Вирџинија Џуфре. Таа е една од десетиците жени кои го тужеа Епстин велејќи дека ги злоставувал во неговите домови во Флорида, Њујорк, Американските Девствени Острови и Ново Мексико.
Џуфре рече дека летото кога наполнила 17 години, била намамена од работа како рецепционерка во спа центар во клубот Мар-а-Лаго на Трамп за да стане „масерика“ на Епстин – работа што вклучувала сексуални дејствија.
Џуфре, исто така, тврдеше дека била под притисок да има секс со мажи познаници на Епстин, вклучително и со британскиот принц Ендру. Сите тие мажи рекоа дека нејзините наводи се измислени. Во 2022 година, Џуфре го повлече обвинението што го упати против поранешниот адвокат на Епстин, професорот по право Алан Дершовиц, велејќи дека „можеби направила грешка“ кога го идентификувала како насилник.
Тужбата на Џуфре против Максвел беше решена во 2017 година, но Мајами Хералд отиде на суд за да пристапи до судските документи првично поднесени затвпрени, вклучително и транскрипти од интервјуата што адвокатите ги направија со потенцијални сведоци.
Околу 2.000 страници беа отворени за јавноста од судот во 2019 година. Дополнителни документи беа објавени во 2020, 2021 и 2022 година.
Следната серија записи остана запечатена поради правата на приватност на жртвите на Епстин и други луѓе чии имиња се појавија за време на правната битка, но не беа соучесници во неговите злосторства.
Што има во документите?
Американскиот окружен судија Лорета А Преска, која ги оценуваше документите за да одлучи што треба да се отвори за јавноста, во својата декемвриска наредба рече дека ги објавува записите бидејќи голем дел од информациите во нив веќе се јавни.
Некои записи се објавени, делумно или целосно, во други судски случаи. Голем дел од останатите вклучуваат теми и луѓе кои се исцрпно опфатени во речиси две децении вредни весници, ТВ документарни филмови, интервјуа, книги и сведоштва на кривичното судење на Максвел.
Лицата именувани во записите вклучуваат многумина од тие кои го обвинуваа Епстин, членови на неговиот персонал кои ги раскажувале своите приказни за таблоидните весници, луѓе кои служеле како сведоци на судењето на Максвел, луѓе кои биле спомнати во моментот, но не се обвинети за ништо и луѓе кои го истражувале Епштајн, вклучувајќи обвинители, новинар и детектив.
Има и познати имиња на јавни личности за кои се знае дека се поврзувале со Епстин во текот на годините, но чии односи со него веќе се добро документирани на друго место, рече судијката.
Еден од нив е Жан-Лук Брунел, француски манекенски агент близок до Епстин, кој чекаше судење под обвинение дека силувал малолетни девојчиња кога се самоуби во париски затвор во 2022 година. Џуфре беше меѓу жените кои го обвинија Брунел за сексуална злоупотреба .
Клинтон и Трамп исто така се споменуваат во судското досие, делумно затоа што Џифре беше испрашувана од адвокатите на Максвел за наводи во весниците за нејзиното време со Епстин. Една приказна ја цитираше како вели дека се возела во хеликоптер со Клинтон и флертувала со Трамп. Џуфре рече дека ниту една од тие работи всушност не се случила. Таа не го обвини ниту поранешниот претседател за некакви дела.
Судијата рече дека неколку имиња треба да останат сокриени во документите бидејќи тие ќе ги идентификуваат луѓето кои биле сексуално злоупотребувани.
Извор: The Guardian
