Поранешниот американски претседател Бил Клинтон и поранешната демократска претседателска кандидатка Хилари Клинтон ќе сведочат во конгресната истрага за покојниот финансист и осуден сексуален престапник Џефри Епстајн, изјави вчера официјален претставник.
Оваа одлука би можела да го спречи најавеното гласање во Претставничкиот дом, кој е под контрола на републиканците, за прогласување на двајцата истакнати демократи за виновни за непочитување на Конгресот – чекор што потенцијално би можел да доведе и до кривични пријави.
Американското Министерство за правда неодамна објави милиони интерни документи поврзани со Епстајн, со што беа откриени неговите врски со бројни влијателни личности од политиката, финансиите, академската заедница и бизнис-светот – и пред и по 2008 година, кога тој призна вина за обвиненија поврзани со проституција.
Клинтонови: Истрагата е политички мотивирана
На прашањето дали Претставничкиот дом ќе го одложи гласањето за нејаснување на Конгресот во случајот со Клинтонови, претседателот на Претставничкиот дом, Мајк Џонсон, изјави за Reuters дека „тоа во моментов се разгледува“.
„Адвокатите ги анализираат деталите“, кратко наведе Џонсон.
Тој претходно ја поздрави веста дека поранешниот претседател и поранешната државна секретарка се согласиле да сведочат. Комитетот за надзор на Претставничкиот дом минатата недела препорача Клинтонови да бидат прогласени за виновни за непочитување на Конгресот, поради одбивање да сведочат за нивниот однос со Епстајн.
Клинтонови понудија соработка со комитетот, но одбија лично појавување, тврдејќи дека истрагата е партиски мотивирана и дека има за цел да го заштити републиканскиот претседател Доналд Трамп.
Летовите на Бил Клинтон со авионот на Епстајн
„Под заклетва ви кажаа што знаат, но тоа очигледно не ве интересира. Сепак, поранешниот претседател и поранешната државна секретарка ќе се појават. Тие со нетрпение очекуваат да постават преседан што ќе важи за сите“, напиша на социјалните мрежи Анхел Урена, заменик-шеф на кабинетот на Клинтонови.
Познато е дека Бил Клинтон неколку пати летал со авионот на Џефри Епстајн на почетокот на 2000-тите години, откако ја напушти функцијата претседател. Тој изрази жалење поради тие контакти и истакна дека не знаел ништо за криминалните активности на Епстајн.
Републиканскиот конгресмен Џејмс Комер, претседател на Комитетот за надзор, изјави дека Клинтонови сè уште не доставиле конкретни датуми за сведочење.
„Адвокатите на Клинтонови рекоа дека се согласуваат со условите, но тие сè уште не се доволно прецизирани, а датумите не се доставени. Ќе ги разјаснам условите со кои се согласуваат, а потоа ќе разговарам со членовите на комитетот за следните чекори“, изјави Комер.
