Најдобрите вина стануваат уште подобри како што стареат, но тоа не значи дека нивните производители треба да бидат старци, како што докажа еден млад британски лозар.
Дваесетгодишниот Ештон Кирби почнал да работи во лозјето Бел Ватер во село во Источен Сасекс, југоисточна Англија, кога неговите родители го купиле во запуштена состојба пред три години.
Оттогаш, поранешното „градско момче“, како што самиот се опишува, се здоби со признание за неговите вештини за производство на вино и оваа година ја освои златната награда за неговата Reserve Cuvée 2018 од британската индустриска асоцијација WineGB.
Тој рече дека потоплото британско време како резултат на климатските промени значи дека сортата на грозје сега произведува „фантастично вино“, кое тој го опиша како англиско Совињон Блан.
Минатата година, истражувањето на Универзитетот во Ридинг го истакна влијанието на климатските промени врз лозарските региони во Британија до 2050 година.
Се прогнозира дека температурите и врнежите во региони, како што се југоисточниот и источниот дел на Англија, ќе значат дека грозјето Шардоне одгледувано во Британија „ќе биде доволно зрело за да произведе висококвалитетно вино во следните години“.
Од WineGB велат дека британската винска индустрија се шири со феноменална брзина, а површината на која се сади грозје се очекува да се удвои до 2032 година.
„Она што почнуваме да го гледаме е појавата на нова генерација на производители на вино“, рече привремениот извршен директор Нед Аути.
Извор: Reuters
