Нејзината ќерка, адвокатката Типен Озјер, сведочеше пред судот, велејќи дека тие измислици ѝ го нарушиле здравјето и длабоко ѝ го промениле секојдневниот живот.
Според Озјер, нејзината мајка живее под постојан притисок и внимателно внимава на секој свој јавен настап – од тоа што ќе облече, до начинот на кој стои или се движи – бидејќи е свесна дека секоја фотографија може да биде злоупотребена и претворена во нов напад. Лажните објави, придружени со исмејувачки коментари и фотомонтажи, ја следат веќе со години, оставајќи траги врз нејзиното ментално и физичко здравје. Озјер рече дека нејзината мајка живее во состојба на постојана вознемиреност и дека „не поминува ден, а некој да не ѝ го спомене тоа“.
Особено тешко, според неа, е тоа што нападите не се ограничени само на Брижит Макрон, туку се одразуваат и врз целото семејство. Внуците на првата дама, рече Озјер, се изложени на подбивања и навреди како „баба ти лаже“ или „баба ти е дедо“. „Ова ја погодува длабоко,“ додаде таа. „Таа не е избрана личност, не барала јавна функција, а сепак е постојано мета на омраза и клевети. Како ќерка, како жена и како мајка, не ѝ го посакувам нејзиниот живот на никого.“
Обвинетите во процесот – осум мажи и две жени, на возраст од 41 до 60 години – се товари за злонамерни објави и коментари за полот и сексуалноста на Брижит Макрон. Некои од нив дури ја споредувале нејзината врска со претседателот Емануел Макрон, кој е 24 години помлад, со „педофилија“. Дел од обвинетите се оправдаа дека нивните објави биле „сатирични“ или „шега“, повикувајќи се на слободата на изразување, но Озјер истакна дека последиците од тие „шеги“ се реални и болни.
Таа ги опиша нападите како „вител што никогаш не запира“, кој ја принудил нејзината мајка да биде постојано на штрек, свесна дека секоја нова слика или јавен настап може да биде искривен и злоупотребен. „Тоа е невозможност да водиш нормален живот,“ рече Озјер. „Секогаш кога мислиш дека ќе можеш да живееш мирно, тоа повторно излегува на површина.“
Случајот во Париз е дел од поширока правна битка против дезинформациите што кружат веќе неколку години, вклучително и тужба за клевета што семејството Макрон ја поднесе во САД против американската конзервативна подкастерка Кендис Овенс, која ги повторувала и ширела истите тврдења. Според тужбата, обвинувањето дека Брижит Макрон е маж по име Жан-Мишел Троњу е целосно лажно – Троњу е, всушност, нејзиниот постар брат, кој живее во родниот град Амијен.
Додека процесот продолжува, француската јавност повторно ја преиспитува тенката линија меѓу слободата на говор и насилството преку интернет. За Брижит Макрон и нејзиното семејство, тоа не е апстрактна правна дебата, туку секојдневна реалност во која лагите и омразата имаат вистински човечки последици.
Извор: The Guardian
