Новата анкета на Reuters/Ipsos, спроведена од 27 до 29 март, покажува дека 60 отсто од испитаниците не ги одобруваат американските удари врз Иран, додека 35 отсто изјавиле дека ги поддржуваат. Дополнително, 66 отсто сметаат дека САД треба брзо да работат на завршување на своето учество во војната, дури и ако тоа значи да не се исполнат сите цели на администрацијата.
Резултатите доаѓаат во момент кога војната сè повеќе станува и внатрешнополитичка тема во САД. Reuters во анализата на анкетата посочува дека растот на цените на бензинот, стравот од дополнителен економски притисок и очекувањата дека конфликтот ќе влијае врз личните финансии на гласачите му даваат на ова прашање дополнителна политичка тежина во пресрет на изборите во ноември 2026 година.
Во своето телевизиско обраќање на 1 април, Трамп изјави дека американската војска речиси ги остварила своите цели во Иран, но не понуди јасен рок за завршување на конфликтот. Наместо конкретен план за повлекување, тој рече дека САД ќе ја завршат работата „многу брзо“ и истовремено остави можност за продолжување на нападите во наредните две до три недели.
Reuters во извештајот за говорот наведува дека во рамки на администрацијата биле разгледувани различни опции за понатамошниот тек на конфликтот, додека дополнителни американски сили продолжуваат да се движат кон регионот на Заливот. Според анализата, тоа укажува дека Вашингтон и понатаму сака да ги задржи отворени воените опции, иако од Белата куќа нема јасен сигнал за тоа како и кога би завршило американското учество во војната.
Така, војната со Иран сè повеќе добива и надворешнополитичко и внатрешнополитичко значење за администрацијата во Вашингтон. Додека официјален план за завршување на конфликтот сè уште нема, анкетата Reuters/Ipsos покажува дека мнозинството испитаници очекуваат побрз и појасен излез од оваа војна
