Кинеската армија денеска започна голема воена вежба околу Тајван, под назив „Правда Мисија 2025“, при што се користи борбена муниција и се распоредени воздушни, поморски и ракетни сили, јавува Би-би-си. Според најавите од Пекинг, сценаријата вклучуваат симулации на можно воено заземање на островот.
Од Народноослободителна армија на Кина соопштија дека активностите имаат за цел тестирање на борбената подготвеност и испраќање „строго предупредување“ до, како што ги нарекоа, „сепаратистите“ и „надворешните интервенционисти“. Вежбата се одвива во период на зголемени тензии во Тајванскиот теснец и внимателно ја следат регионалните и глобалните актери.
Министерството за одбрана на Тајван остро реагираше, обвинувајќи го Пекинг дека го загрозува регионалниот мир и стабилност. Според официјалното соопштение, во изминатите 24 часа околу островот биле забележани најмалку два кинески воени авиони и 11 воени бродови. Тајванската армија е ставена во состојба на висока готовност и започна т.н. „брза вежба за одговор“, чија цел е итно прегрупирање на силите доколку Кина одлучи една од честите воени вежби да ја претвори во реален напад.
„Сите припадници на нашите вооружени сили остануваат во состојба на целосна будност и подготвеност, преземајќи конкретни мерки за одбрана на вредностите на демократијата и слободата“, се наведува во соопштението на тајванското Министерство за одбрана.
Според првичните проценки, вежбите ќе траат неколку дена, најмалку два, а постои можност тие да имаат влијание врз меѓународниот воздушен и поморски сообраќај во регионот.
