Кина започна со регрутирање експерти за нова „планетарна одбранбена единица“ по проценките дека астероид би можел да ја погоди Земјата во 2032 година. Огласот за вработување, кој го објави Државната администрација за наука, технологија и индустрија за национална одбрана (SASTIND), бара млади дипломци со експертиза во аеронаутика, меѓународна соработка и детекција на астероиди.
Фокусот е на астероидот 2024 YR4, кој се наоѓа на врвот на списокот на потенцијално опасни објекти на Европската и Американската вселенска агенција. Минатата недела аналитичарите ја зголемија проценката за веројатноста за негов удар од 1,3% на 2,2%. Советодавната група на ООН за планирање вселенски мисии редовно се состанува за да разгледа соодветни мерки.
Огласите објавени на WeChatu повикуваат дипломци под 35 години со напредни технички квалификации и лојалност кон Комунистичката партија на Кина. Меѓу 16-те понудени работни места, три се директно поврзани со новата одбранбена единица.
Огласот предизвика широка расправа на социјалните мрежи. „Ако успеете, ќе бидете херои кои го спасиле светот“, беше еден од популарните коментари на Weibu. Друг додаде: „Но ако не успеете, никој нема да ве казни… бидејќи буквално сите ќе исчезнат“.
Кина веќе развива вселенски технологии за одбрана од потенцијално опасни астероиди. Планира сопствен тест за пренасочување во 2027 година, додека САД и Европа претходно успешно тестирале слични системи.
Експртите предупредуваат дека уништувањето на помали астероиди може да создаде дополнителни фрагменти со непредвидливи патеки, што може да претставува уште поголема закана.
Сепак, научниците нагласуваат дека нема причина за паника. „Знаеме дека имаме капацитет за пренасочување астероиди, како што покажа тестот на NASA DART“, изјави планетарниот научник Харисон Агруса. „Астероидот 2024 YR4 не треба да предизвикува страв, туку треба внимателно да се проучи“, додаде тој, пренесува Guardian.
